Евро-2016: Кечаги ўйинлар ҳақиқий футбол байрамлари тақдим этди

Тошкент. 16 июн. ЎзТАГ – Тўлқин Ташимов. 15 июндан 16 июнга ўтар кечаси ҳақиқий футбол ўйинларига гувоҳ бўлдик: россияликлар бор имкониятларини намойиш қилишган бўлишса (1:2), руминлар уларга зарур бўлган дурангга эришдилар (1:1),  французлар эса ажойиб ўйин кўрсатдилар (2:0).

Тошкент вақти билан соат 18.00да Россия Словакияга қарши ўйнади.

Россия термасига нисбатан “ўйнади” феълини қўллашимга сабаб, жамоа кўрсатган ўйин аслида ҳозирги пайт ва вазиятга унчалик тўғри келмайди. Нега дейсизми? Чунки россияликларнинг ўйин услуби, тўғрисини айтганда, ўтган асрнинг сўнгги даврларига хос бўлган футболни эслатади. Ҳар бир квадрат метрда курашни тақозо этувчи замонавий футболни эса на Кокорин, на Дзюба, на Глушаков, ва на бошқа ўйинчилар ўйнашга қодир эмаслар. Бу исбот талаб этилмайдиган фактдир.

Словаклар эса рақиблари мудофаасидаги бўш нуқталардан усталик билан фойдаландилар. Хусусан, Гамшик, голли тўп узатиб, ўзи ҳам тўп киритди. Ишонч билан айтиш мумкинки, бундай тоифадаги ўйинчи Россия термасида йўқ.

Айни пайтда, кишининг ёдига Россия термаси муҳташам ўйин кўрсатган Евро-2008 турнири тушади. Ўшанда Андрей Аршавин ва Юрий Жирковлар қанотлардан яхши хужумлар уюштирган эдилар. Ушбу ўйинчилар аслида “Олтин тўп”га Роналду ва Месси, ёки Роберто Карлос билан бирга даъвогарлик қилишлари мумкин бўлган футболчилар эди. Энди эса, словаклардан мағлубиятдан сўнг Уэльс билан кечадиган ўйин “Ортимизда Москва...” шиори остида ватанпарварлик руҳида ўтади. Бундан маъни борми? Россия ўтган ўйинда бор имкониятини кўрсатди. Аслида, РФС Аршавин ва Жирков даражасидаги истеъдодлар нега тўлиқ очила омаётганини таҳлил қилганида, бу россия футболини соғломлаштиришга қараб ташланган биринчи қадам бўлар эди.

Айтмоқчи, хужумчи Александр Кокорин йилига 5,5 млн евро олади.

Словаклар эса ўртача даражадаги европа футболини кўрсатдилар. Шунинг ўзи рақибни енгиш учун етарли бўлди.

Соат 21.00да эса Руминия ва Швейцария бир бирига қарши келди.

Бирданига айтиб ўтишни истардимки, Албания билан ўйинда, ушбу ўйинда ҳам Лихтштайнер, Бехрами, Мехмеди, Шера, Жаки, Шакири ва Сеферович ижросида қизиқарли футбол кўришни истаган эдим. Лекин бу таниқли ўйинчилар ҳам мақтарли ўйин намойиш этмадилар ҳисоби, Шакири эса очиқчасига кейинги ўйинни заҳирада ўтказадиган бўлди.

Ўз навбатида, руминлар таркибида юлдуз даражасидаги ўйинчилар бўлмагани ҳолда қизиқарли футбол намойиш қилдилар. Ҳатто ғалаба қилишлари ҳам мумкин бўлгани ҳолда дуранг билан қаноатландилар. Руминия гуруҳдаги учинчи ўйинини Албания билан ўтказади. Швейцария эса Франция билан ўйнайди. Руминлар тренери Ангел Йордэнескунинг тактик режасига кўра, албанлар билан ўйинда очко олиш турнир мезбонлари билан ўйиндагига қараганда осонроқ бўлади. Ангел қанчалик устамон тактик эканлигини эса вақт кўрсатади.

Барибир ушбу ўйин ҳаяжони, динамикаси ва майдондаги кураши жиҳатидан энг қизиқарли ўйин бўлди.

Соат 00.00да Франция Албанияга қарши чиқди.

Учранглилар бош тренерининг барча хатолари, ўйинчиларнинг қатъийятсизлиги ва иккинчи тайм ўртасигача биртекис ўйиннинг бўлмаганлигини осонлик билан тушунтириш мумкинлигини таъкидлаб ўтиш зарур. Бир томондан, Дидье Дешам ишқибозлар ва футбол раҳбариятининг босими остида бўлди. Иккинчи томондан, француз футболчиларининг ҳозирги авлоди ўта истеъдодли, шу сабабли унинг ҳар қандай қарори шафқатсиз танқид қилинади.

Аслида, Дешам хужумга Оливье Жиру ва Димитри Пайеларни тушириб хатога йўл қўйди. Гризманн ўрнига тушган Коман Зайниддин Зидан услубидаги ўйин билан эсда қолди. Бори шугина.

Албания эса мудофаа чизиғини яхши қура олди ва ҳатто 80-дақиқада дурангни ушлаб тура оладигандай бўлиб ҳам кўринди. Биринчи ўйинда ўзини кўрсата олмаган Поль Погба худди сўнгги марта ўйинга тушгандай ўйнади. Чап қанотга ўтказилган Пайе ҳам яхши ўйин намойиш қилди. Гризманн эса гол уришга ҳам муваффақ бўлди. Агар Дешам Жируни олдинроқ алмаштирганида французлар голларни бундай мураккаб шароитда урмаган бўлар эдилар.

Албанияга келсак, жамоа унчалик ҳам ёмон формада эмас, кези келганда, тезкор ўйин кўрсатишиҳам мумкин. Лекин 90 дақада давомида эмас. Албанлар французларнинг хужумларидан шунчалик чарчадиларки, руминларга бирон бир қаршилик қила олишига киши шубҳа қилади.

Эслатиб ўтамизки, Европа чемпионатининг финал турнирида илк маротаба 24 миллий терма қатнашмоқда. Улар олти гуруҳга бўлинган. Гуруҳ турнирининг сўнгги ўйинлари 22 июнда ўтказилади. 1/8 финалга гуруҳларда биринчи ва иккинчи ўринларни олган термалар, шунингдек, учинчи ўринни олган тўртта энг яхши жамоа чиқади. 1/8 финал ўйинлари 25-27 июнда, 1/4 финал ўйинлари 30 июндан 3 июлгача ўтказилади. Яримфинал ўйини 6 июлда Лионда ва 7 июлда Марсел шаҳарларида бўлиб ўтади. Учинчи ўрин учун ўйин эса умуман ўтказилмайди.

Чемпионатнинг финал ўйини 11 июлда “Стад де Франс” стадионида бўлиб ўтади.