Евро-2016: Крис Коулман Марк Вильмотсга, ёки Гарет Бэйл Эден Азарга қарши

Тошкент. 1 июл. ЎзТАГ – Тўлқин Ташимов. Тошкент вақти билан соат 00.00да Лилла шаҳридаги стадионда Евро-2016 1/4 финалининг Уэльс ва Бельгия ўртасидаги учрашуви бошланади. Аслида бу Крис Коулманнинг Марк Вильмотсга, ёки Гарет Бэйлнинг Эден Азарга қарши келишини билдиради.

Келинг, таҳлилни бир савол билан бошлаймиз! Ишқибозлардан ким Уэльснинг бош тренери Крис Коулман Бельгия термасига бошчилик қилаётган ҳамкасби Марк Вильмотсни тактик жиҳатдан енгишига ишонади? Кўпчилик айнан бугун кечаси Бельгия  билан ўйинда Евро 2016даги валлийча эртак ниҳоясига етади, деб ҳисоблайди.

Бунга эса икки сабаб бор.

Биринчи сабаб – Бельгиянинг фантастик таркиби. Де Брейне, Ража Наингголан, Маруан Феллайни, Дрис Мертенс, Мусса Дембеле, Насер Шадли ва, ниҳоят, Эден Азар – буларнинг бари ўрта бўғиндаги юқори даражадаги ўйинчилар бўлиб, ҳатто шунинг ўзидан икки тўлақонли жамоа тузиш мумкин. Бунга Ромелу Лукаку, Феррейра Карраско, Дивок Ориги, Кристиан Бентеке каби хужумчиларни қўшинг. Булар ёнига Венсан Компани, Ян Вертонген, Томас Вермален, Тоби Алдервейрелд, Николас Ломбертс каби ҳимоячиларни ҳам қўйинг. Яъни Вильмотс ана шу ўйинчиларнинг барига ишониши мумкин.

Бош мураббийнинг ягона бош оғриғи – ушбу ажоиб ўйинчилар орасидан ўнта энг муносибини танлаб олиш бўлса керак (дарвозабон Тибо Куртуага ҳозирча муқобил йўқ).

Иккинчи сабаб – бельгияликларнинг 1/8 финалда Венгрияга қарши ўйини. Аввалда улар гуруҳда итальянларга кутилмаган ҳолда 0:2 ҳисобида бой беришди, лекин кейин ўзларини қўлга олиб, Ирландия ва Швеция устидан умумий ҳисобда 4:0 ҳисобида ғалаба қозонишди. Плей-оффнинг илк ўйинидаёқ Бельгия кучли жамоа сифатида намоён бўлди. Олдинги турда Евро яримфиналчиси Португалия билан 3:3 ўйнаган венгерлар устидан ғалаба қозониш ҳам осон иш эмас, тўғрими?

Бу жуда яхши натижа. Ҳатто кишида, жамоа бош тренери жамоани ўйиндан ўйинга яхшироқ шаклга киритиб бормоқда, деган таассурот пайдо бўлади.

Азарнинг жанговар ҳолати ва жамоанинг венгрлар билан ўйиндаги юқори тезкорлиги Вильмотс ўз ниятига етганини кўрсатмоқда.

Албатта, Крис Коулманнинг ҳам ўзига яраша ишонадиган жиҳатлари бор. Гарет Бэйл ва Аарон Рэмзи, гуруҳ ва 1/8 финалдаги Шимолий Ирландия билан ўйин кўрсатгани каби, ҳар қандай учрашувнинг тақдирини ҳал қилишлари мумкин.

Лекин тўғриси, Уэльс термаси таркиби Бельгия термасиники каби фантастик эмас. Ўйинчилар ҳам камтарроқ, юқоридаги иккисидан ташқари ўйинчиларнинг техник имкониятлари ҳам бир нави. Лекин уларнинг ишониб бўлмас даражадаги фидокорлигини тан олиш керак.

Кўпчилик термалар тақдирга тан берган вақтида ҳам Уэльс ҳеч қачон бўйсунмайди. Улар бутун 90 дақиқа давомида худди ҳаётларида охирги марта майдонга тушганлари каби ўйин кўрсатишга қодирлар. Айнан фидокорлик ва ғалабага бўлган ишонч кичик Уэльсни катта футбол гигантига айлантириши мумкин.

 Буни ҳам бош тренер, ҳам футболчиларнинг ўзлари яхши билишади. Агар улар 1/2 финалга ўтишса – миллий қахрамонга айланадилар.

Хуллас, ўйин ўта қизиқарли, қаторасига иккинчи тун эса уйқусиз бўлиши кутилмоқда...

Эслатиб ўтамизки, Евро-2016нинг ярим финалига чиқиш учун бугун 1 июлда Лиллда Уэльс ва Бельгия термалари, 2 июлда Бордода Италия ва Германия, 3 июлда Сен-Денида Исландия ва Франция майдонга тушадилар.

Евро-2016нинг яримфинал ўйинлари 6 июлда Лионда ва 7 июлда Марсел шаҳарларида бўлиб ўтади. Учинчи ўрин учун ўйин эса умуман ўтказилмайди.

Чемпионатнинг финал ўйини 11 июлда “Стад де Франс” стадионида бўлиб ўтади.