Евро-2016: Уикенд эсда қоларли бўлди
Тошкент. 20 июн. ЎзТАГ – Тўлқин Ташимов. Уикенд эсда қоларли бўлди: бельгияликлар ниҳоят яхши даражадаги футбол кўрсатдилар, албанлар руминларни сенсацион равишда енгишди, қолган ўйинларда дуранг қайд этилди.
18 июн куни уч ўйин бўлиб ўтди.
Тошкент вақти билан соат 18.00да Бельгия Ирландияни 3:0 ҳисобида енгди.
Биринчи ўйиндаги итальянларга мағлубиятдан сўнг (0:2) ушбу қизиқарли, тезкор, ақлли ва техник ўйинчиларга эга бўлган жамоа ўзини йўқотиб қўймаслигини жуда истаган эдим.
Яхшиямки бундай бўлмади.
Улар ирландларни нафақат барча томондан енгишди, балки буни ишончли ва чиройли равишда амалга оширишди. Айнан шу нарса бельгияликларга биринчи ўйинда етишмаган эди.
Айтмоқчи, гуруҳдаги шведлар билан бўладиган сўнгги ўйиндаги ғалаба ҳам белгияликларга биринчи ўринни олишга имкон бермайди. Бу ўринни гуруҳдаги бошқа етакчиси Бельгия ва Швецияни умумий 3:0 ҳисобида енгган Италия термаси эгаллади.
Ўз навбатида, фидокорона ўйини билан кишини ўзига мафтун қилган ирландлар ҳеч нима кўрсата олмадилар.
Соат 21.00да майдонга Исландия ва Венгрия чиқди.
Исландия Португалия билан сенсацион дурангдан кейин иккинчи ўйинда гуруҳнинг кутилмаган етакчисига (Венгрия 2:0 ҳисобида Австрияни енгди) ютқазиб қўйишдан жуда қўрқаётган эди. Одатда, Исландия каби жамоалар битта ўйинни яхши ўтказиши мумкин, лекин, унинг ғайрати иккинчи ўйинга кўпинча етмайди.
Лекин бу сафар ундай бўлмади.
Венгрларнинг хатоси шундаки, улар исландлардан ўйин даражаси бўйича устунлик қилишга уринишди. Бунинг эса европа футболи даражаси ўсган ҳозирги пайтда иложи йўқ. Шу сабабли 1:1 ҳисоби қайд этилди.
Соат 00.00да Португалия ва Австрия майдонга тушди.
Бу ўйинни жуда кутганимни айтиб ўтишим керак. Чунки Криштиану Роналду, ниҳоят, уйқудан уйғониб голларни қалаштириб ташлаши керакдай туюлган эди. Тўғри, баъзи-базида у чиройли ўйин кўрсатиб, яхши тўплар етказиб берди.
Лекин бундан ортиқ ҳеч нима юз бермади.
Аммо нима етишмаётганини айтиш жуда қийин. Тахминимча, Роналдуга ўзини ўзи-яхши ҳис этишига ёрдам берувчи биттагина гол етишмаяпти. Пенальтини ура олмагани эса футболчига яхши таъсир қилмаслиги аниқ...
Нани яхши ўйин кўрсатди, Португалиянинг яширин қуроли бўлиши кутилган Куарежма эса бутунлай ўйинга қўшилиб кета олмади. Қолганлар ҳақида ҳам шундай дейиш мумкин.
Австрия ўйинини таҳлил қиладиган бўлсак, бир нарсани айтиб ўтиш зарур. Австрияликлар рақибга қараб ўйнашди. Роналду ва шериклари ўзлари кўниккан ўйинни намойиш қилиб, баъзида хавфли хужумлар уюштиришди. Лекин бу ҳеч қандай натижа келтирмади.
Оқибатда ўйин 0:0 ҳисобида якунланди.
“F” гуруҳидаги вазият ҳозир шундайки, сўнгги ўйинда Португалия 5 очко билан биринчи ўринни олиши учун Венгрияни енгиши кифоя. Исландия эса, гуруҳда биринчи ўринга даъвогарлик қилиши учун Австрияни мағлуб этиши керак. Ҳам Португалия, ҳам Исландия ғалаба қилишса, ғолиб урилган ва ўтказиб юборилган голлар бўйича аниқланади.
Португалия-Венгрия ўйинида дуранг қайд этилса, венгрлар 99% эҳтимол билан гуруҳ ғолиби бўлишади. Ҳатто охирги ўйиндаги австрияликлар ҳам исландларни енгишса, плей-оффга чиқиш имконига эга бўладилар.
19 июнда эса икки ўйин бўлиб ўтди.
Сўнгги ўйинларни параллел равишда ўтказиш ғояси яхши ғоя эканлигини айтиб ўтишни истар эдим. Бу орқали УЕФА келишилган ўйинлар қайд этилиши ҳавфини камайтирмоқчи. Лекин футбол учун яхши бўлган нарса, ишқибозлар учун аксинча натижа бериши мумкин.
Икки канал орқали Франция-Швейцария ва Руминия-Албания ўйинларини бир вақт кузатишни ҳам унча мароқли иш дейиш қийин. Айниқса, икки ўйин Тошкент вақти билан соат 00.00да бошланган бўлса...
Агар Франция бош тренери Дидье Дешамнинг тажрибалари давом этиб, иккинчи ўйинда заҳирада бўлган Гризманн ва Погбалар асосий тартибда тушишган бўлса, швейцария жамоасида Шакири яхши ўйин кўрсатди.
Бир ярим тайм давомида жамоалар бир бирларига шунчаки хужумлар уюштириб туришди. Бу орада фақат Погбанинг 30 метрдан тепган тўпи ва заҳирадан тушган Пайетнинг кучли зарбасини ажратиб кўрсатиш мумкин. Леқин 70-дақиқадан сўнг жамоалар дуранг ҳам уларни қониқтириши мумкинлигини эслаб қолишди чамамда ва қолган 20 дақиқада деярли ҳеч қандай арзирли вазият юзага келмади.
7 ва 5 очко йиғган француз ва швейцарлар плей-оффга биринчи ва иккинчи ўриндан чиқишни кафолатладилар.
Албания ва Руминия ўйинида эса ҳақиқий сенсация содир бўлди. Бир голни уришга муваффақ бўлган албанлар руминларнинг кўплаб хужумларига қарамасдан ғулабани асраб қолдилар. Ва 3 очкога эга Албания энди барча гуруҳлардаги ўйинлар тугашини кутмоқда.
Шу натижа билан плей-оффга чиқиб олишса ҳам ажаб эмас. Балким омадлари келиб қолар...
Эслатиб ўтамизки, Европа чемпионатининг финал турнирида илк маротаба 24 миллий терма қатнашмоқда. Улар олти гуруҳга бўлинган. Гуруҳ турнирининг сўнгги ўйинлари 22 июнда ўтказилади. 1/8 финалга гуруҳларда биринчи ва иккинчи ўринларни олган термалар, шунингдек, учинчи ўринни олган тўртта энг яхши жамоа чиқади. 1/8 финал ўйинлари 25- 27 июнда, 1/4 финал ўйинлари 30 июндан 3 июлгача ўтказилади. Яримфинал ўйини 6 июлда Лионда ва 7 июлда Марсел шаҳарларида бўлиб ўтади. Учинчи ўрин учун ўйин эса умуман ўтказилмайди.
Чемпионатнинг финал ўйини 11 июлда “Стад де Франс” стадионида бўлиб ўтади.
