Европалик экспертлар Ўзбекистонга Қонунчиликни такомиллаштириш концепциясини ишлаб чиқишга ёрдам берадилар

Тошкент. 25 май. ЎзТАГ – Ўзбекистонда республика қонунчилигини янада такомиллаштириш учун Қонунчиликни такомиллаштириш концепциясини ишлаб чиқиш режалаштирилмоқда, деб хабар беради Ўзбек телеграф агентлиги (ЎзТАГ).

Бу ишга хорижий экспертларни жалб этиш масалалари Европа Иттифоқи Кенгашининг Ютта Эдтхофер бошчилигидаги Шарқий Европа ва Марказий Осиё бўйича Ишчи гуруҳининг (COEST) делегацияси билан Ўзбекистон Республикаси Адлия вазирлигида бўлиб ўтган учрашувда муҳокама қилинди.

Вазирликдан маълум қилишларича, шунингдек, томонлар нотариал соҳада давлат хизматлари тизимини такомиллаштириш жараёни, бу соҳаларда чет эл тажрибасини ўрганиш ва хорижда миллий кадрлар тайёрлаш йўналишларида ҳамкорлик имкониятларини муҳокама қилдилар.

Ўзбекистон Республикаси Адлия вазирининг биринчи ўринбосари Нодиржон Жўраев иштирокидаги учрашувда меҳмонларга муассаса фаолияти ва мамлакатда амалга оширилаётган ислоҳотлар тўғрисида маълумот берилди.

Эслатиб ўтамизки, Европа Иттифоқи Кенгашининг Шарқий Европа ва Марказий Осиё бўйича Ишчи гуруҳи Европа Иттифоқига аъзо 28 давлатлар вакилларидан иборат эксперт органи бўлиб, унинг ваколатларига Европа Иттифоқининг Шарқий Европа ва Марказий Осиё мамлакатлари билан икки томонлама ва минтақавий муносабатларининг барча жиҳатларини кўриб чиқиш киради.

Ушбу ишчи гуруҳи Европа Иттифоқининг Европа Иттифоқи ва Ўзбекистон ўртасидаги ҳамкорликнинг долзарб масалалари бўйича қарор қабул қилувчи органлари учун тавсиялар ва таклифлар ишлаб чиқади.

Сурат манбаи: http://etoday.kz/business-and-economy/15071-es-zapustil-v-uzbekistane-proekt-po-ustoychivomu-razvitiyu-selskogo-hozyaystva.html