Фарғона вилоятида мақом театри ташкил этилди
Дата: 15:49, 06-09-2019.
Тошкент. 6 сентябрь. ЎзТАГ - Фарғона вилоятининг Марғилонида мақом театри ташкил этилди, дея хабар беради Ўзбек телеграф агентлиги (ЎзТАГ).
"Ҳукуматнинг 2019 йил 5 сентябрдаги 732-сонли қарори билан ўзбек миллий санъат маркази қошида Марғилон шаҳар мусиқа мақом театри давлат муассасаси шаклида ташкил этилди", - дейилади Адлия вазирлиги матбуот хизмати хабарида.
Қайд этилганидек, театр мақом санъатини юксак бадиий асарлар, театрлаштирилган томошалар ва концерт дастурлари орқали тарғиб этишга хизмат қилади.
Қарорда айтиб ўтилганидек, мақом театри ижодий жамоаси учун республика давлат театрларининг малакали мутахассисларини жалб этган ҳолда маҳорат дарслари ўтказилади.
Сурат манбаи: kultura.uz
