Февралда Россияда ўзбек автомобиллари сотуви ҳажми 33% тушиб кетди

Тошкент. 17 март. ЎзТАГ – Жорий йилнинг феврал ойида Россияда ўзбек автомобиллари сотуви ҳажми 33% тушиб кетди дея хабар беради Ўзбек телеграф агентлиги (ЎзТАГ) Европа бизнеси ассоциацияси Автоишлабчиқарувчилар қўмитасига асосланган ҳолда.
“Февралда РФда Ўзбекистонда ишлаб чиқарилган 4536 автомобиль сотилди. Ўтган йилнинг феврал ойида дилерлар 6797 ўзбек автомобилини сотишган эди”, - дейилади Европа бизнеси ассоциацияси матбуот релизида.
2014 йилнинг икки ойи натижаларига кўра, Ўзбекистон автомобиллари сотуви ушбу мамлакатда 34 фоизга “чўкиб”, 8254 донани ташкил қилди. Ўтган йилнинг шу даврида Россия ҳудудида 12490 ўзбек автомобиллари сотилган эди.
Россияда Daewoo бренди остида сотиладиган ўзбек автомобиль саноати сотувлар ҳажми бўйича ишлаб чиқарувчилар орасида 13 ўринни эгаллади. Ишлаб чиқарувчининг бозордаги улуши эса 2013 йилнинг январ-февралидаги 3,4 фоиздан жорий йилнинг январ-феврали натижаларига кўра 2,3 фоизгача қисқарди.
Россияда йил бошидан бери энг кўп сотилаётган 25 автомобиллар рўйхатига фақатгина 4569 дона сотилган Gentra (23 ўрин) модели кирди. Февралда сотилган ўзбек автомобилларининг ярмидан кўпини (2450) айнан ушбу модел ташкил қилади.