ФИФАнинг янги рейтингида Ўзбекистон олдинги ўрнида қолди

Тошкент. 19 декабр. ЎзТАГ – Халқаро футбол уюшмалари федерацияси – ФИФА миллий терма жамоаларнинг янги рейтингини эълон қилди. Унга кўра, Ўзбекистон миллий терма жамоаси рейтингида аввалги ойда эгаллаган ўрнини ўзгартирмади ва 74-ўринда қолди, дея хабар беради Ўзбек телеграф агентлиги (ЎзТАГ).

Республика Футбол федерациясидан хабар қилишларича, Ўзбекистон МДҲ мамлакатлари терма жамоалари ўртасида Украина (25) ва Россиядан (31) кейинги 3-ўринда бормоқда.

Янги рейтингда Ўзбекистон миллий терма жамоаси ҳамон Осиё футбол конфедерацияси жамоалари орасида 4-ўринда бормоқда. Қитъа рейтингида эса Эрон (51) яна бир марта Япония билан жой алмашди ва Осиёнинг биринчи рақамли жамоасига айланди. Шу тариқа, Осиё Қитъаси рейтингида Ўзбекистон Эрон (51), Япония (54) ва Жанубий Кореядан (69) кейинги ўринни эгаллаб турибди.

Қайд этиш жоизки, Ўзбекистон миллий терма жамоасининг Осиё Кубоги-2015 финал босқичи “В” гуруҳидаги рақиблари жаҳон рейтингида қуйидаги ўринларда: Хитой (97), Саудия Арабистони (102) ва КХДР (150).

Жаҳон рейтингида эса амалдаги жаҳон чемпиони - Германия пешқадам бўлиб турибди. Энг кучли учликнинг кейинги ўринларида Аргентина ва Колумбия терма жамоалари ўрин олишган.