Филиппиннинг Ўзбекистондаги элчиси инвестфорумда қатнашиш учун Тошкентга келди
Тошкент. 5 ноябр. ЎзТАГ – Филиппин Республикасининг Фавқулодда ва Мухтор Элчиси Эдуардо Мартина Р.Меньеза (қароргоҳи Теҳронда) Халқаро инвестицион форумда қатнашиш учун Тошкентга келди, деб хабар беради Ўзбек телеграф агентлиги (ЎзТАГ).
Инвестфорум Ўзбекистон пойтахтида бугун, 5 ноябрда очилди.
Куни-кеча у Ўзбекистон Республикаси Ташқи ишлар вазирлигида қабул қилинди.
ТИВ маълум қилишларича, томонлар учрашувда Ўзбекистон-Филиппин ҳамкорлигини, аввало, савдо-иқтисодий соҳада ривожлантириш масалалари муҳокама қилганлар.
Эдуардо Мартина Р.Меньеза филиппин бизнесининг Ўзбекистон ишбилармонлик доиралари билан ўзаро манфаатли шартномаларни йўлга қўйишдан манфаатдорлигини билдирди.
Мамлакатлар икки томонлама товар айланмасини ошириш, савдони диверсификация қилиш ҳамда қўшма инвестиция лойиҳаларини амалга ошириш учун улкан фойдаланилмаган салоҳиятга эгалиги таъкидланди.
Учрашувда томонларни қизиқтирган бошқа масалалар ҳам кўриб чиқилди.
Эслатиб ўтамизки, икки мамлакат ўртасидаги дипломатик алоқалар 1992 йил 13 апрелда ўрнатилган. Эдуардо Мартина Р.Меньеза 2015 йил февралдан бери Ўзбекистонда элчилик қилади.
