ФХХ Санкт-Петербургда терактларга тайёргарлик кўришда гумон қилинаётган етти нафар Маркакзий Осиёликни ҳибсга олди

Тошкент. 28 июл. ЎзТАГ – РФ Федерал хавфсизлик хизмати (ФХХ) ходимлари Санкт-Петербургда терактларга тайёргарлик кўришда гумон қилинаётган етти нафар Марказий Осиёликни ҳибсга олди, дея хабар қилинади махсус хизмат сайтида.

“2017 йил 28 июл куни Россия Федерал хавфсизлик хизмати томонидан келиб чиқиши Марказий Осиёдан бўлган 7 кишидан иборат гуруҳ ҳибсга олинди. Улар Санкт-Петербург шаҳрида одам гавжум жойларда ва темир йўл транспортида террорчилик ҳаракатларига тайёргарлик кўришда гумонланмоқда”, - дейилади жума куни тарқатилган хабарда.

Таъкидланишича, қўлга олинган шахсларнинг исми шарифи ҳозирча маълум қилинмаяпти. “Тергов-қидирув ишлари давом этмоқда”, - дейилади хабарда.

РИА Новости маълумотига кўра, эркаклардан бири поезд билан “авария” уюштирмоқчи бўлганини тан олган.

Эслатиб ўтамизки, 3 апрелда Петербургдаги “Сенная площадь” ва “Технологический институт-2” метро бекатлари орасида худкуш-террорчи Акбаржон Жалилов ўзини ўзи портлатиб юборган эди. Ўшанда 16 киши, шу жумладан, унинг ўзи ҳам қурбон бўлган эди. Ушбу жиноий иш бўйича 10 киши ҳибсга олинган.