FMO голланд банки “Ҳамкорбанк” ОАТБ акционерлари таркибига кирди

Тошкент. 28 октябр. ЎзТАГ – Голланд Тадбиркорликни ривожлантириш давлат корпорацияси (De Nederlandse Financierings-Maatschappij voor Ontwikkelingslanden NV, FMO) Ўзбекистоннинг “Ҳамкорбанк” Очиқ акционерлик тижорат банкининг (ОАТБ) 15% акцияларни сотиб олиб, банк акционерлари таркибига кирди, дея хабар беради Ўзбек телеграф агентлиги (ЎзТАГ).

“FMOнинг банк акционерлари таркбига кириши унинг институционал ривожига кўмаклашиб, Ўзбекистон банк тизимига илғон халқаро тажрибани олиб келишда ёрдам беради”, - деди “Ҳамкорбанк” бошқаруви раиси Олмахон Тўражонова.

Айни пайтда битим қиймати ошкор қилинмаяпти. Илгари FMO 2012-2014 йилларда ўзбек банкига $13 млнлик кредит линияси бергани хабар қилинган эди.

FMO “Ҳамкорбанк”нинг иккинчи хорижий акционери бўлди. 2010 йил майда банк акционерлари сафига Халқаро молия корпорацияси муассасанинг 14,5% акцияларини $3 млнга сотиб олиб кирган эди.

Эслатиб ўтамизки, “Ҳамкорбанк” 1991 йилда Андижонда ташкил этилган бўлиб, ўрта тоифадаги банклардан бири. Банк асосан кичик ва ўрта корхоналар ва якка тадбиркорларга хизмат кўрсатади.

FMO 1970 йилда ташкил этилган бўлиб, 51% акциялари Голландия ҳукуматига қарашли. Қолган акциялар голланд банклари, касаба уюшмалари, корхона ва хусусий шахслар қўлида. Ҳозирда FMO дунёнинг 80 ошиқ мамлакатларида лойиҳалар амалга оширмоқда.

Илгари ЎзТАГ FMO “Ҳамкорбанк” акционерлари таркибига кириш ниятида эканлигини хабар қилган эди.