Франция Гондурасни дабдала қилди, Аргентина эса Босния ва Герцоговинадан зўрға қутулди
Тошкент. 16 июн. ЎзТАГ – Франция Гондурасни 3:0 ҳисобида дабдала қилди, Аргентини эса Босния ва Герцоговинадан 2:1 ҳисобида зўрға қутулди, дея хабар беради Ўзбек телеграф агентлиги (ЎзТАГ).
Умуман, жаҳон чемпионатининг 4-кунида Франция-Гондурас, Аргентина-Босния-Герцоговина ўйинларини одамнинг унча ҳам кўргиси келмаётган эди. Нега дейсизми, чунки жаҳон чемпионатининг биринчи уч кунида ажойиб ўйинларга гувоҳ бўлиб, тўйиб қолдик шекилли! Испания-Голландия, Англия-Италия ўйинларидан кейин юқоридаги ўйинлар кишида унча қизиқиш уйғотмаётган эди.
Лекин...
Кутилгани каби, Франция Гондурасни янчиб ташлади, десак, хато қилмаган бўламиз. Гондурасликлар қўпол, баъзан ўта қўпол ўйнадилар. Лекин французлар бунга қарши қўполлик билан жавоб бермадилар. Бундан ташқари, гондурас термаси чемпионатга бирон бир режа билан келмаганлиги маълум бўлиб қолди. Буни, замонавий футбол учун кутилмаган ҳол деса бўлади. Шу сабабли Карим Бенземанинг хетт-трики ўйинни ҳал қилди.
Аргентинадан ҳам кўпчилик боснияликларни енгишини кутган эди. Жамоа таркиби юқори тоифали ўйинчилар билан тўла, яхши заҳира ўйинчилар кўп ва бир неча мега юлдузларнинг борлиги бунга кафил эди. Лекин биринчи таймда Лионель Мессининг тепган тўпини босниялик ҳимоячи ўз дарвозасига уриб қўйганидан кейин аргентиналиклар бутун таймда тўпни шунчаки юмалатиш билан шуғулландилар холос.
Фақат ўйиннинг 65-минутида Месси яна бир уйғониб, яна битта гол урди. Жавоб тариқачида боснияликлар ҳам битта тўп ўришди, лекин бундан бошқасига ярамадилар.
Хуллас, икки ўйин натижалари бўйича Франциянинг тартибли уюшган ўйини ва Аргентина термасининг ланж тўп сураётганлиги маълум бўлиб қолди. Аргентина кейинги ўйинларгача йиғилиб, ўз кучини кўрсата оладими, деган савол эса очиқ қолмоқда.
