Франция телеканалида Ўзбекистон ҳақида фильмлар яратилди

Тошкент. 22 феврал. ЎзТАГ – 21 февралда Тошкентдаги Француз альянсида “ARTE” француз телеканали томонидан Ўзбекистон ҳақида яратилган уч ҳужжатли фильмлар намойиши ташкил этилди, деб хабар беради Ўзбек телеграф агентлиги (ЎзТАГ).

Намойиш Франциянинг Ўзбекистондаги элчихонаси, Тошкентдаги Француз Альянси ва Ўзбекистон Республикаси Туризмни ривожлантириш давлат қўмитаси томонидан ташкил этилди.

“Ўзбекистонда “Ипак йўли ва бошқа мўъжизалар” номли ҳужжатли фильмнинг уч бўлими суратга олиниши натижасида “ARTE” француз телеканалининг 350 мингдан 400 минггача француз ва немис телетомошабинлари Ипак йўлининг афсонавий шаҳарлари ҳақидаги сирлар, ҳикоя ва афсоналар билан танишадилар”, - деб таъкидланади Франциянинг Ўзбекистондаги элчихонаси хабарида.

Ҳар бири 20 дақиқадан иборат учта фильм французча ва русча субтитрлар билан намойиш этилди.

Улар “ARTE” телеканалининг мухбири Альфред де Монтескью томонидан яратилган умумий ҳужжатли циклнинг бир қисмига айланди. Бу серияга кирган фильмлар томошабинларни Марко Полонинг тарихий маршрути бўйлаб етаклайди ва бу йўлда яшаган халқлар ва маданиятлар билан таништиради.

Сурат манбаи: http://www.1news.az/news/telekanal-arte-v-ocherednoy-raz-iskazil-realii-nagorno-karabahskogo-konflikta