Футбол бўйича олий лига жамоалари ўртасида Ўзбекистон чемпионатига қуръа ташланди
Тошкент. 18 декабр. ЎзТАГ – Олий лига жамоалари ўртасида Ўзбекистоннинг 24-чемпионатига қуръа ташлаш маросими бўлиб ўтди, дея хабар беради Ўзбек телеграф агентлиги (ЎзТАГ) Ўзбекистон Профессионал футбол лигаси сайтидаги маълумотга асосланган ҳолда.
Мазкур маросим тартибига кўра, бир минтақа жамоалари ўз уй ўйинларини бир турда ўтказмаслиги учун жамоалар жуфтликларга ажратилиб чиқилди. Унга кўра қуйидаги жуфтликлар ташкил этилди: “Пахтакор”/”Локомотив”, “Насаф”/“Машъал”, “Олмалиқ”/”Металлург”, “Навбаҳор”/”Андижон”, “Нефтчи” – “Қўқон-1912”.
Клублар учун рақамлар саватчадан 2014 йилги турнир жадвалида олган ўрнидан келиб чиқиб тортиб олинди.
Қайд қилиб ўтиш зарурки, Олий Лига клублари вакиллари иштирокидаги йиғилишда 2015 йилги мавсум ўйинлари тақвими ўтган мавсумдагидек қилиб тузилади. Унга кўра, чемпионатнинг дастлабки турида ўзаро ўйнайдиган жамоалар иккинчи давра ўйинларини ҳам ўзаро ўйин билан бошлайдилар.
Олий Лига янги мавсумининг илк тури 2015 йил 13-14 март кунлари ўтказилса, 2-тур баҳслари 20-22 март кунлари бўлиб ўтади.
Янги мавсумни эса Ўзбекистон Суперкубоги учун баҳсда аввалги мавсум чемпиони “Пахтакор” ва Кубок соҳиби “Локомотив” клублари ўзаро ўйин билан очиб беришади. Ушбу баҳс келаси йил 8 март куни бўлиб ўтади.
