Футбол бўйича Ўзбекистон чемпионати Суперлига деб қайта номланди
Тошкент. 21 ноябр. ЎзТАГ – Кейинги йилдан бошлаб мамлакатнинг футбол бўйича бош чемпионати “Ўзбекистон Суперлигаси” деб, Биринчи лига эса “Ўзбекистон Про лигаси” деб қайта номланади, деб хабар беради Ўзбек телеграф агентлиги (ЎзТАГ).
“Суперлигада жами 12та жамоа иштирок этади. Тўртта даврадан иборат мусобақада жами 38та тур ўйинлари бўлиб ўтади. 12та жамоа 33та тур ўтказгач, 2та гуруҳга бўлинишади. Яъни 1-6 ўринларни эгаллаган жамоалар чемпионлик учун, 7-12 ўринни эгаллаган жамоалар эса Суперлигада қолиш учун курашишади”, - деб таъкидлашди Ўзбекистон Футбол федерациясида.
38-турдан сўнг очколар бўйича 1-ўринни эгаллаган жамоа чемпионликка эришади. 12-ўринни эгаллаган жамоа ПРО-лигага тушиб кетади. 11-ўринни эгаллаган жамоа эса ПРО-лигада 2-ўринни қўлга киритган жамоа билан иккита плей-офф учрашувини ўтказади. Ғолиб жамоа Суперлигада иштирок этиш ҳуқуқини қўлга киритади.
Ўзбекистон ПРО-лигасида 16та жамоа иштирок этади. Улар икки даврадан иборат мусобақада жами 30та учрашув ўтказадилар. Ғолиб жамоа Суперлига йўлланмасини қўлга киритади.
