Футбол бўйича Ўзбекистон миллий терма жамоасининг пойтахт йиғини бошланди

     Тошкент. 22 июл. ЎзТАГ – Футбол бўйича Ўзбекистон миллий терма жамоаси Тошкентда ўзининг навбатдаги ўқув-машғулот йиғинини бошлади, дея хабар беради Ўзбек телеграф агентлиги (ЎзТАГ).
     “Жамоанинг бош мураббийси Миржалол Қосимов мазкур йиғинга жами 26 нафар футболчини чақирган бўлиб, уларнинг кўпчилигини 1991, 1992 ва ундан кейинги йилларда туғилган футболчилар ташкил этади. Бунга сабаб шу йилнинг сентябр ойида Ўзбекистон термасининг Жанубий Кореянинг Инчеон шаҳрида старт оладиган Осиё Ўйинларидаги иштирокидир. Регламентга кўра, унда фақат 23 ёшгача бўлган футболчилар иштирок этишлари мумкин”, - деб қайд этишди мамлакат Футбол федерацияси матбуот хизматида.
     Мазкур йиғин давомида терма жамоа 4 назорат учрашуви ўтказиши режалаштирилган. Жумладан, 22 июл куни “Навбаҳор” клубига қарши синов-назорат учрашуви бўлиб ўтса, орадан икки кун ўтиб, 24 июл куни “Металлург” клубига қарши учрашув ўтказилади. 26 июл куни режага кўра Тошкентнинг “Пахтакор” ва 28 июл куни “Олмалиқ” клубларига қарши назорат учрашувлари ўтказилади.