Футбол бўйича Ўзбекистон олимпия термаси Осиё чемпионатига йўлланма олди
Тошкент. 25 май. ЎзТАГ - Футбол бўйича Ўзбекистон олимпия термаси 2016 йил январида Қатарда бўлиб ўтадиган Осиё чемпионати U-23 финал қисмига йўлланма олди, деб хабар беради Ўзбек телеграф агентлиги (ЎзТАГ).
Эслатиб ўтамизки, турнир қоидаларига кўра Осиё чемпионатига ўз гуруҳларида биринчи ўринни олган 10 жамоа, шунингдек, иккинчи ўринни олган ҳамда малака иккинчи жамоалари орасида энг яхши натижаларга эга бўлган 5 терма чиқади. Ўзбекистон гуруҳда иккинчи ўринни олди ва кўрсаткичлар бўйича бешинчи жамоа бўлди. Уни фақат “В” гуруҳи жамоалари ушбу ўриндан чиқариб юбора олишлар мумкин эди.
“Малака босқичининг сўнгги турида “B” гуруҳи етакчиси Иордания терма жамоаси Қувайт билан 3:3 ҳисобида дуранг ўйнади. Ушбу натижадан сўнг Иордания 7 очко билан гуруҳда биринчи ўринни қўлга киритди ва ОЧ йўлланмасини олди. Қувайт олимпия терма жамоаси 4 очко билан гуруҳда иккинчи бўлди. Бу Қувайтга қитъа биринчилигига чиқиш учун етмади ва шу тариқа Ўзбекистон олимпия терма жамоаси 6 очко билан гуруҳларда иккинчи ўринни қўлга киритган терма жамоалар ичида Кувайт терма жамоасидан яхшироқ кўрсатгичга эришди ва Осиё чемпионатига йўлланма олди”, – деб таъкидлашди Футбол федерацияси матбуот хизматида.
