Футбол бўйича Ўзбекистон ўсмирлар терма жамоаси Осиё чемпионатининг ярим финалига ўта олмади

Тошкент. 15 сентябр. ЎзТАГ – Футбол бўйича Ўзбекистон ўсмирлар (U-16) терма жамоаси Осиё чемпионатининг чорак финал ўйинида Суриялик тенгдошларига ютқазиб қўйди (2:5), дея хабар беради Ўзбек телеграф агентлиги (ЎзТАГ).

“Кучли ёмғир остида бўлиб ўтган учрашув футбол эмас, сув полоси ўйинини эслатди. Бундай оғир шароитларда суриялик футболчилар жисмонан кучлироқ эканлиги маълум бўлди. Улар Ўзбекистон термаси дарвозасига 5 тўп йўллашга мувофиқ бўлдилар, айни пайтда ўз дарвозаларидан 2 тўп ўтказдилар. Мағлубият жамоамизни 2015 йилда Чилида бўлиб ўтадиган жаҳон чемпионати финалига чиқиш имкониятидан маҳрум қилди”, – деб таъкидлашди мамлакат Футбол федерацияси матбуот хизматида.

Эслатиб ўтамизки, илгари ЎзТАГ Ўзбекистон ўсмирлар (U-16) терма жамоаси Осиё чемпионати гуруҳ босқичи учинчи турида Қувайт устидан 4:2 ҳисобида ғалаба қозониб, “С” гуруҳида биринчи ўрин билан чорак финалга чиққани ҳақида хабар қилган эдик.