Футбол бўйича Ўзбекистон ўсмирлар терма жамоасининг Малайзиядаги йиғини бошланди
Тошкент. 26 август. ЎзТАГ – Футбол бўйича Ўзбекистон (U-16) ўсмирлар терма жамоаси кеча Осиё Чемпионатига тайёргарлик босқичидан ўрин олган сўнгги йиғинини ўтказиш учун Малайзия пойтахти Куала-Лумпур шаҳрига етиб келди, дея хабар қилади Ўзбек телеграф агентлиги (ЎзТАГ).
“Терма жамоа делегацияси Куала-Лумпурдаги “Хилтон” мехмонҳонасига жойлашди. Бугун куннинг иккинчи ярмида Александр Мочинов шогирдлари бу ердаги илк машғулотларини бошлайди”, - деб таъкидлашди Ўзбекистон Футбол федерацияси матбуот хизматида.
Малайзиядаги йиғин 31 августгача давом этади. Мазкур йиғин давомида терма жамоа 26 ва 28 август кунлари Малайзия (U-16) ўсмирлар термасига қарши иккита ўртоқлик ўйинида майдонга тушади. Малайзиядаги йиғин якунига етгач, терма жамоа Осиё Чемпионатида иштирок этиш учун у ердан тўғри Таиландга йўл олади. Ўзбекистон терма жамоаси чемпионатнинг гуруҳ босқичида Непал, Кувайт ва КХДР ўсмирлар терма жамоаларига қарши ўйнайди.
