Футбол бўйича Ўзбекистон ўсмирлар терма жамоасининг пойтахт ўқув-машқ йиғини бошланди

Тошкент. 7 август. УзТАГ – Тошкентда Футбол бўйича Ўзбекистон ўсмирлар (U-16) терма жамоасининг ўқув-машқ йиғини бошланди, дея хабар беради Ўзбек телеграф агентлиги (ЎзТАГ).

“Жамоа Таиландда ўтказиладиган ўсмирлар ўртасидаги Осиё чемпионати финал босқичига тайёргарлик кўрмоқда. Александр Мочинов шогирдлари таниқли мутахассис Дилшод Нуралиев етакчилик қилаётган Тошкентнинг “Пахтакор” клуби ёшларига қарши назорат учрашуви ўтказди. Эслатиб ўтамизки, айнан Нуралиев бошчилигида Ўзбекистон ўсмирлар термаси 2012 йилда Осиё чемпионлигини қўлга киритган эди. Ўзбекистон термаси ва “Пахтакор” ўртасидаги учрашув Дилшод Нуралиев шогирдларининг 3:1 ҳисобидаги ғалабаси билан тугади”, - деб таъкидлашди Ўзбекистон Футбол федерацияси матбуот хизматида.

Ўзбекистон терма жамоаси пойтахт йиғини доирасидаги иккинчи учрашувини “Бунёдкор”нинг ёшлар жамоасига қарши ўтказади.