Футбол бўйича Ўзбекистон ўсмирлар термаси Қатар билан дуранг ўйнади

     Тошкент. 22 июл. ЎзТАГ – Футбол бўйича Ўзбекистон ўсмирлар (U-16) терма жамоаси Туркиянинг Истанбул шаҳрида давом этаётган халқаро турнирдаги иккинчи ўйинини ўтказди, дея хабар беради Ўзбек телеграф агентлиги (ЎзТАГ).
     “Бу сафар Александр Мочинов шогирдлари Қатар ўсмирларига (U-16) қарши тўп сурдилар. Қизиқарли курашларда кечган учрашувда 1:1 ҳисоби қайд этилди. Ўзбекистон ўсмирларининг ўйиндаги ягона голига Суҳроб Нуруллоев муаллифлик қилди”, - деб қайд этишди мамлакат Футбол федерацияси матбуот хизматида.
     Эслатиб ўтамизки, Туркиядаги турнирни Ўзбекистон ўсмирлари Саудия Арабистони ўсмирларига қарши ўтказиб, 0:3 ҳисобида мағлубиятга учраган эди. Ўзбекистон ўсмирлар (U-16) терма жамоаси турнирдаги кейинги ўйинини 22 июл куни Иордания ўсмирларига қарши ўтказади. Турнирдаги сўнгги ўйин эса 24 июл куни БАА ўсмирлар терма жамоасига қарши бўлиб ўтади.