Футбол бўйича Ўзбекистон термаси илк марта Уругвай термаси билан ўйнайди

Тошкент. 7 июн. ЎзТАГ – Футбол бўйича Ўзбекистон термаси илк марта икки марта жаҳон чемпиони Уругвай термаси билан ўйнайди, деб хабар беради Ўзбек телеграф агентлиги (ЎзТАГ) Миллий олимпиа қўмитаси матбуот хизматига таянган ҳолда.

8 июн куни Тошкент вақти билан соат 04:00да бошланадиган ўртоқлик учрашуви “SPORT” ҳамда “Матч ТВ” телеканаллари орқали жонли эфирда намойиш этилади.

“Уругвай термасига қарши ўйин терма жамоамиз учун тарихий аҳамиятга эга ҳисобланади. Зеро миллий терма жамоамиз илк маротаба Жанубий Америка қитъаси вакилига қарши кураш олиб боради. Биз ушбу баҳсда футболчиларимизга омад тилаймиз ва уларни биргаликда қўллаб қувватлаймиз”, - дейилади хабарда.

Таъкидланишича, Оскар Табарес шогирдлари жаҳон чемпионатининг гуруҳ босқичида мундиал мезбони Россия билан бир гуруҳдан жой олган. “Шундай экан, мазкур қарама-қаршилик нафақат юртимиз чарм тўп иҳлосмандлари, балки россиялик футбол ишқибозлари ва мутахассислари учун ҳам ғоятда қизиқ ва муҳим”, - деб таъкидланади хабарда.

Сурат манбаи: https://ok.ru/klubmoikh/topic/65922407200179