Футбол бўйича Ўзбекистон термасининг бош тренери Японияга мағлубиятдан кейин тушкунликка тушгани йўқ

Тошкент. 1 апрел. ЎзТАГ - Футбол бўйича Ўзбекистон термасининг бош тренери Миржалол Қосимов Япония билан ўртоқлик учрашувидаги 1:5 ҳисобидаги мағлубиятдан кейин умидсизликка тушгани йўқ, дея хабар беради Ўзбек телеграф агентлиги (ЎзТАГ).

Ўзбекистон Футбол федерацияси сайтида қайд этилишича, терма жамоа етакчиси “натижадан, албатта, норози бўлди”. “Бугун имкониятларимиздан паст даражада ўйнадик. Япония каби жамоа билан ўйинда шунча хатога йўл қўйилса, бирданига бунинг жазосини оласан”, - деб таъкидлади Қосимов.

“Учрашувнинг ўртоқлик аҳамиятини назарда тутиб, очиқ футбол кўрсатишга ҳаракат қилдик ва майдонга бирданига икки ҳужумчи чиқардик. Аммо рақиб ҳужумда ҳам, ҳимояда ҳам ажойиб ўйин намойиш қилди. Айниқса, японларнинг тезкор қарши ҳужумларини алоҳида таъкидлаган бўлар эдим. Жамоа аниқ ва тезкор футбол намойиш этди. Бунда биз оптимал таркибда ўйнамаганимиз ҳам рол ўйнади, аммо ўртоқлик учрашувлари айнан захирадагиларни синаш учун ташкил қилинади”, - деб давом эттирди терма жамоа бош мураббийси.

“Учрашув давомида рақиб дарвозаси олдида кўп вазиятлар яратдик, аммо, афсуски, улардан фойдалана олмадик. Натижада таблода шундай ҳисоб акс этди. Шунга қарамай, тушкунликка тушиш ва қўлларимизни туширмаслигимиз керак. Расмий ўйинларгача яхши тайёрланиб, хулосалар чиқариб олишимиз керак. Уларгача яна бир назорат учрашуви ўтказамиз", - деб хулоса қилди мутахассис.