“Газпром” Ўзбекистон ва Қозоғистон билан газ харид нархларини пасайтириш ҳақида келишиб олди
Тошкент. 26 май. ЎзТАГ – Россиянинг “Газпром” ширкати Ўзбекистон ва Қозоғистон билан газ харид нархларини пасайтириш ҳақида келишиб олди, деб хабар беради Ўзбек телеграф агентлиги (ЎзТАГ) компания материалларига асосланган ҳолда.
“Ўзбекистон ва Қозоғистондан олинаётган газ харид нархларининг пасайтирилиши ҳақида келишувга келинди”, - дейилади хужжатда.
Шу билан бирга, компания 2015 йилда туркман гази ҳажмларининг сезиларли даражада қисқаргани ҳақида маълум қилган.
“Газпром” раҳбарининг ўринбосари Александр Медведевга асосланиб ТАССнинг хабар қилишича, "Туркмангаз" билан шартнома Туркманистон томонидан газ нархи билан боғлиқ конструктив позиция намоён қилинмагани сабабли бекор қилинган. Шу сабабли жорий йилнинг 1 январидан “Газпром” туркман газини сотиб олишни тўхтатган.
Шу билан бир вақтда компания 2016 йил 1 январдан Ўзбекистондан табиий газ сотиб олиш ҳажмини оширган. Ўзбек газини сотиб олишни кўпайтириш бўйича келишувга 2015 йилнинг декабрида эришилган. 2016 йилда сотиб олинадиган ўзбек гази ҳажми 3,1 млрд куб метрдан ошиши мумкин. 2015 йилда эса шу миқдордаги газ Туркманистондан сотиб олинган.
