GM Uzbekistan авто нархининг нега доллар курсига боғланганлигини тушунтириб берди

Тошкент. 30 июн. ЎзТАГ – GM Uzbekistan Ўзбекистонда ишлаб чиқарилган автомобиллар нархининг нега доллар курсига боғланганлигини тушунтириб берган расмий хабар тарқатди, деб хабар беради Ўзбек телеграф агентлиги (ЎзТАГ).

“Ишлаб чиқарилган маҳсулот ва хизматлар нархини АҚШ долларига боғлаш иқтисодиёт субъектлари томонидан кенг қўлланилиб келинаётган амалиёт бўлиб, кўпчилик учун янгилик эмас. Масалан, миллий авиакомпания, мобил алоқа операторлари, интернет провайдерлари, туристик фирмалар ўз товар ва хизматлари учун тарифларини эркин конвертациядаги хорижий валютада, АҚШ доллари ёки еврода белгилайдилар. Тўловлар Марказий банкнинг тўлов санасидаги расмий курси асосида миллий валютада амалга оширилади”, - деб таъкидланади компания хабарида.

Айни пайтда, деб изоҳланади GM Uzbekistan хабарида, автомобиль учун олдиндан тўловнинг минимал миқдори (85%) амалга оширилгандан кейин тўловнинг қолган қисмига валюта курси ўзгариши таъсир қилмайди ва автомобиль учун тўлов шартнома тузилган кундаги курс асосида амалга оширилади, яъни автомобиль нархи ўзгармайди.