GM Uzbekistan АЖ енгил автомобиллар нархини пасайтирмайди

Тошкент. 11 январ. ЎзТАГ – GM Uzbekistan АЖ акциз солиғи ставкаси ўзгарганига қарамасдан енгил автомобиллар нархини пасайтирмайди, деб хабар беради Ўзбек телеграф агентлиги (ЎзТАГ) ўзбек компанияси матбуот хизматига асосланган ҳолда.

Ширкат хабарида айтилишича, мамлакат раҳбарининг “Валюта сиёсатини либераллаштиришнинг бирламчи чора-тадбарлари тўғрисида”ги қарорига мувофиқ, Ўзбекистондаги товар ва хизматлар нархлари фақат миллий валютада белгиланади.

 Маҳаллий  автомобиллар нархлари кескин кўтарилишининг олдини олиш мақсадида миллий валюта курси ўзгариши муносабати билан ҳамда амалдаги нархларни сақлаш мақсадида GM Uzbekistan автомобиллари нархлари ЎзР. Марказий банкининг 2017 йил 31 августдаги курси бўйича (4210,35 сўм) белгиланган.  

Шу сабабли ҳам курс ўзгаришининг GM Uzbekistan АЖ фаолиятига салбий таъсирини қоплаш мақсадида ҳисоб-китобларда GM Uzbekistan енгил автомобилларининг акциз солиғи ставкаси 5% даражасида қабул қилинган. Бу ҳол курс фарқидан келадиган харажатларни қоплашга имкон берди ва енгил автомобилларнинг нархи барқарорлигини таъминлади.

Шундай қилиб, акциз солиғи ставкасининг пасайиши GM Uzbekistanда ишлаб чиқарилаётган енгил автомобилларининг нархи пасайишини кўзда тутмайди, дейилади компания хабарида.

Сурат манбаи: https://al-ain.com/article/gm-pulls-more-than-2-5-million-cars-in-china