GM Uzbekistan газбаллон ускуналарга эга бўлган “Ласетти” ишлаб чиқаришни бошлади
Тошкент. 11 феврал. ЎзТАГ – GM Uzbekistan ўзбек-америка автокорхонаси газбаллон ускуналарга эга бўлган “Ласетти” ишлаб чиқаришни бошлади, деб хабар беради Ўзбек телеграф агентлиги (ЎзТАГ).
“GM Korea ва Landi-Renzo (Италия) компаниялари билан биргаликдаги лойиҳа доирасида автомобиль ва газ баллонли ускунани (ГБУ) калибровкалаш ишлари бажарилди, халқаро сифат стандартларига мувофиқ ГБУнинг деталлари ва бутловчи қисмларининг зарурий синов ишлари ўтказилди. Шунингдек, икки ёқилғили тизимга мослаштирилган двигателнинг оптимал ишлаши учун барча зарурий синовлар ўтказилди”, - деб таъкидлашди GM Uzbekistan компаниясида.
Заводда автомобилларга ўрнатилаётган ГБУ Италиянинг Faber (баллонлар) ва “Ўзавто-Ланди Рензо” ҚК (капотости қурилмаси қисмлари) компаниялари етказиб бермоқда.
Янги ускуналар автомобилда бензин ва газ билан тўла тўлдирилган ҳолда 1130 км, жумладан, бензинда 850 км ва газда 280 км йўл босишгача кўпайтиришга имкон беради. Айни пайтда машина газ баллон тўла тўлдирилган ҳолда 90 км/соат тезликда 280 км, шаҳар ичида 230 км йўл босади.
