GM Uzbekistan ишлаб чиқаришдан олиб ташланган автомобиллар моделларига доир вазиятни ойдинлаштирди
Тошкент. 17 апрел. ЎзТАГ – GM Uzbekistan ишлаб чиқаришдан олиб ташланган автомобиллар моделларига доир вазиятни ойдинлаштирди, деб хабар беради Ўзбек телеграф агентлиги (ЎзТАГ).
“Tico, Epica ва Nexia 2 автомобилларини ишлаб чиқариш билан боғлиқ бўлган кўп сонли мурожаатлар туфайли GM Uzbekistan акциядорлик жамияти Tico – 2004 йилда ишлаб чиқаришдан олинган, Epica ишлаб чиқарилиши 2012 йилда тўхтатилган, Nexia 2 ишлаб чиқарилиши эса 2016 йилнинг 1 августида тўхтатилганини маълум қилади”, - дейилади компаниянинг Фейсбук саҳифасидаги хабарида.
Шундан кейин таъкидланишича, 2008 йилда истеъмолчилар афзалликлари ва бозор талабларидан келиб чиққан ҳолда Nexia автомобили модернизацияси амалга оширилган. “Nexia 2 автомобилининг ишлаб чиқарилиши тўхтатилиши – янги экологик стандартлар ва хавфсизлик тизимлари учун янги талаблар жорий этилиши билан боғлиқ. 2016 йил ўртасидан бошлаб эса 3-авлод янги Nexia 3 моделини ишлаб чиқариш бошланган бўлиб, ушбу машина 1,5 л.лик тежамкор двигател, ABS тизими, хавфсизлик ёстиқчалари, иммобилайзер, кундузги чироқлар (DRL), ISOFIX болалар автокреслолари учун маҳкамлагичлар билан жиҳозланган”, - деб таъкидланади хабарда.
Автомобилларнинг модел қаторлари, модификациялари, опциялари ва нархларига доир ҳар қандай ўзгаришлар ҳақида GM Uzbekistanнинг расмий сайтида ва Facebookдаги саҳифаси орқали хабар қилиб борилади, деб хулоса қилинади хабарда.
