GM Uzbekistan компанияси халқаро пластик карталар орқали сотиладиган Lacetti-2 ва Cobalt машиналари нархларини пасайтирди

Тошкент 4 июн. ЎзТАГ – 2015 йилнинг 3 июнидан бошлаб то 31 декабрга қадар GM Uzbekistan АЖ халқаро пластик карталар орқали сотиладиган Lacetti-2 ва Cobalt автомобилларининг нархларини пасайтирди, деб хабар беради Ўзбек телеграф агентлиги (ЎзТАГ) "Ўзавтосаноат” АК сайтидаги маълумотга асосланган ҳолда.

ЎзТАГ мухбирига компания сall-марказида маълум қилишларича, Lacetti-2 ва Cobalt автомобилларининг биринчи ва иккинчи позициядаги машиналари нархлари валюта пластик карточкаси орқали ҳақ тўлаганда 15% пасайтирилган.

Пойтахтдаги Driver’s Village сервис маркази маълумотларига кўра, бундан олдин Cobalt LS (биринчи позиция) моделининг баҳоси 32619200 сўмни, Cobalt LT (иккинчи позиция) модели баҳоси 35027570 сўмни, Lacetti SX (биринчи позиция) модели баҳоси 38358000 сўмни, Lacetti CDX/M/T (иккинчи позиция) модели баҳоси 44333540 сўмни ташкил қилган.

Бундан олдинроқ кейинги 2 йилда GM Uzbekistan томонидан ишлаб чиқарилган автомобилларнинг нархлари деярли ўзгармагани ҳақида хабар қилинган эди.