GM Uzbekistan Ravon бренди моделлари қаторини кенгайтиради
Тошкент. 4 апрел. ЎзТАГ – GM Uzbekistan Ravon бренди моделлари қаторини кенгайтиради. Бу ҳақида Россия ОАВ Ravon бош директори Шароф Ашуровнинг сўзларига асосланган ҳолда хабар қилмоқда.
Унинг сўзларига кўра, русум қаторида бирданига икки янги модель пайдо бўлади. Биринчи бўлиб С-классдаги унча қиммат бўлмаган модель кўрсатилади. Кўп эҳтимоли билан Ravon номи остида Россияда яхши таниш бўлган Chevrolet Cruze ишлаб чиқарила бошлайди.
Маълумки, АҚШда ҳозирда иккинчи авлод Chevrolet Cruze модели сотилмоқда. Унинг биринчи авлоди эса Ravon сифатида конвеерга тушади. Ўзбекистонда автомобилнинг ҳар уч версияси – Chevrolet Cruze хетчбэк, седан ва универсали ишлаб чиқарилади.
Иккинчи модель эса SUV-B синфидаги Ravon ихчам кроссовери бўлади. Бу ерда гап бир оз ўзгартирилган Chevrolet Tracker ҳақида кетаётган бўлиши мумкин. Бюджет кроссовери конвейерга рестайлинггача бўлган версияда туширилади. Бошланғич маълумотларга кўра, унга 140 от кучига эга 1,8-литрли бензин мотор ўрнатилади.
