GM Uzbekistan табиий газда ишловчи автомобиллар ишлаб чиқаришни бошлайди

Тошкент. 18 март. ЎзТАГ – 2015 йил кузда GM Uzbekistan табиий газда ишловчи автомобиллар ишлаб чиқаришни бошлайди, дея хабар беради Ўзбек телеграф агентлиги (ЎзТАГ) компаниядаги манбага асосланган ҳолда.

Манбанинг сўзларига кўра, газбаллон ускуналари GM Uzbekistan заводига Avtosanoat-Landi Renzo ўзбек-итальян қўшма корхонаси томонидан етказиб берилади.

Газ ускуналари ўрнатилган 25 автомобиллар ҳозирда мамлакатнинг уч вилоятида синовдан ўтмоқда.

Компания режаларига кўра, 1,5 минг бундай машиналарнинг биринчи партияси жорий йил октябрда сотувга чиқади. Газ ускуналари GM Uzbekistanда ишлаб чиқарилаётган деярли барча моделларга ўрнатилади (Captiva жипидан ташқари).

Avtosanoat-Landi Renzo ҚК 2014 йил июлда “Навоий” эркин иқтисодий ҳудудида ташкил этилган. Корхона таъсисчилари “Ўзавтосаноат” акционерлик компанияси ва италиянинг Landi Renzo S.p.A компаниясидир.

Ушбу ширкат муқобил ёқилғиларда ишловчи автотранспорт воситалари учун қисмлар ва тизимлар ишлаб чиқариш бўйича дунёда етакчи ҳисобланади. Лойиҳага киритилган бошланғич сармоялар миқдори $1,8 млнни ташкил этган. Лойиҳани амалга ошириш доирасида ишлаб чиқаришни локализация қилиш ҳам кўзда тутилган. Компания маҳсулотлари GM Uzbekistanнинг Ўзбекистондаги 74 дилерларига етказиб берилмоқда.