GM Uzbekistan янги авлод Malibu моделини ишлаб чиқаришни бошламоқда
Тошкент. 27 апрел. ЎзТАГ – GM Uzbekistan янги авлод Malibu моделини ишлаб чиқаришни бошламоқда, деб хабар қилинади компания сайтида.
“GM Uzbekistan компанияси тўлиқ янгиланган Chevrolet Malibu бизнесс-класс седанини ишлаб чиқара бошлади. Машина янада тежамкор ва технологик бўлишдан ташқари, хавфсизлик ва қулайлик кўрсаткичлари ҳам сезиларли даражада ошди”, - дейилади хабарда.
Автомобилни йирик қисмлардан йиғиш SKD технологияси бўйича GM Uzbekistan АЖнинг Тошкентдаги филиалида амалга оширилади.
“Янги модел буткул бошқача ички ва ташқи кўриниши, замонавий техник ишланмалар билан таъминлангани билан фарқланади. Автомобиль 186 от кучига тенг 2,5 л ҳажмли двигатель, ёнилғи сарфининг 100 кмга 10,8 лгача камайтирилишини таъминловчи 6 босқичли янги авлод автомат трансмиссия билан жиҳозланган”, - деб таъкидланади хабарда.
Таъкидланишича, ҳайдовчи ва йўловчиларни ҳимоялаш тизими такомиллаштирилган бўлиб, модель 8та хавфсизлик ёстиқчаси (жумладан, шифтда ва орқа ўриндиқдаги йўловчилар учун), барқарор курс ва антибуксир тизимлари билан жиҳозланган.
Бундан ташқари, эргономика ва электрон тизимлар функционаллиги яхшиланган, марказий консолда 7 дюйм диагоналли тачскрин экранга эга MyLink кўнгилочар-ахборот мажмуаси мавжуд. “Салондаги шовқинни камайтириш тизими белгиланган меъёрлар ошган тақдирда электрон бошқарув блоки сигналларининг автомат равишда ютилишини таъминлайди”, - дейилади хабарда.
Шунингдек, янгиланган Malibu моделида автомобилни калитсиз масофадан бошқариш (двигателни ёқиш ва ўчириш, эшиклар ва юкхона бўлимини масофадан очиш ва қулфлаш), рул чамбарагини икки нафар ҳайдовчи учун белгиланган ҳарорат мезонларини сақлаб қолиш хусусиятига эга қиздириш имконияти мавжуд.
Ўзбекистон бозорида машина тўрт: марваридли оқ, тутунли оқ, тўқ кулранг ва қора рангда чиқарилади.
Компания сайти маълумотларига кўра, автомобилнинг нархи 210 млн сўмни, халқаро пластик карта бўйича ҳисоб-китобда 110,852 млн сўмни ташкил этади.
Malibuнинг техник кўрсаткичлари билан ишлаб чиқарувчи сайтида танишиш мумкин.
$1 = 3706,22 сўм
