Голландия Хавфсизлик кенгаши Малайзия Boeingининг ҳалокатига доир бошланғич текширув натижаларини маълум қилди
Тошкент. 9 сентябр. ЎзТАГ – Малайзия Boeingининг Украинадаги ҳалокатига ҳаво кемасига ташқаридан катта қувват билан урилган кўплаб объектлар сабаб бўлган бўлиши мумкин, деб хабар беради Қозоқ телеграф агентлиги (КазТАГ) Голландия Хавфсизлик бўйича кенгашига асосланган ҳолда.
“Самолет фюзеляжи ва кабинага етказилган зиёнлар характери улар самолёт ҳалокатига ташқаридан катта қувват билан урилган кўплаб объектлар сабаб бўлган деб тахмин қилишга имкон беради. Кўп эҳтимоли билан ушбу объектлар самолёт таркибий бутунлигининг бузилиши ва унинг қисмларга бўлиниб кетишига олиб келган. Шунингдек, бу самолётнинг бирдан радарлар эътиборидан йўқолиб қолиши ва ер билан алоқаси узилиши сабабларини ҳам изоҳлайди”, - дейилади Кенгашнинг авиаҳалокат якунларига доир сешанба куни очиқланган бошланғич хулосасида.
Айни пайтда, самолётнинг қулашига техник нособликлар ҳам сабаб бўлган бўлиши ҳам мумкин, деб таъкидланади.
“Бўлаклар самолёт учиш чоғида бўлиниб кетганлигини англатмоқда. Ҳаво кемаси Амстердамдан чиқиш пайтида соз ҳолда бўлиб, техник муаммолари бўлмаган ва у малакали экипаж томонидан бошқарилган”, - дейилади хабарда.
Хабарда айтилишича, авиаҳалокатнинг ҳақиқий сабабларини топиш учун қўшимча вақт керак бўлади.
Эслатиб ўтамизки, Malaysia Airlinesга қарашли Boeing-777 MH17 рейсини бажариш доирасида Амстердамдан Куала-Лумпурга учиб кетаётган бўлиб, 17 июл кечаси ҳалокатга учраган. Лайнер Украинанинг Донецк вилояти Грабово қишлоғи атрофида қулаган. Кема бортида 298 киши бўлган (уларнинг кўпчилиги Голландия фуқаролари). Ҳеч ким омон қолмаган.
