Гулистон шаҳрида инвестиция форумининг якунлари бўйича 30га яқин ҳамкорлик шартномаси имзоланди

Тошкент. 26 август. ЎзТАГ - Сирдарё вилоятининг Гулистон шаҳрида инвестициявий форум якунлари бўйича 30га яқин ҳамкорлик шартномаси имзоланди, дея хабар беради Ўзбек телеграф агентлиги (ЎзТАГ).

Гулистон шаҳрида I Халқаро инвестиция форуми 22 август куни бўлиб ўтди.

Тадбирда тегишли вазирлик ва идоралар, дипломатик корпус вакиллари, 30дан ортиқ мамлакатдан 200дан ортиқ хорижий компаниялар раҳбарлари иштирок этди.

"Форум якунида турли соҳаларда ҳамкорлик тўғрисида 30га яқин битим имзоланди. Жумладан, 4та Сирдарё вилояти ҳокимлиги раҳбарияти, маҳаллий тадбиркорлар ҳамда италиялик бизнес вакиллари томонидан қуёш энергетикасини ривожлантириш, қишлоқ хўжалигида ўзаро ҳамкорлик ва атроф-муҳитни тозалаш каби долзарб йўналишлар бўйича ҳужжат имзоланди", - дейилади Ташқи ишлар вазирлиги (ТИВ) матбуот хизмати хабарида.

Хусусан, Италиянинг Group Villa Maria» (GVM) тиббиёт компанияси Гулистон шаҳрида мамлакатнинг биринчи юрак-қон томир марказини ташкил этишга сармоя киритмоқчи. Лойиҳа муваффақиятли амалга оширилганда GVM Самарқанд, Зомин ва республиканинг бошқа шаҳарларида шу каби марказларни ишга туширади. Ушбу компания билан Наманганда замонавий эндокринология марказини ташкил этиш масаласи ҳам ишлаб чиқилмоқда.

Қайд этилганидек, «Italmatec» ва «Italprogetti» компаниялари билан чарм ва чарм маҳсулотлари ишлаб чиқариш, «Margraf» компанияси билан табиий тошларни қайта ишлаш, шунингдек, «Wellfort» фабрикасида «Robe Di Kappa» компанияси билан спорт кийимлари ишлаб чиқариш лойиҳалари устида иш олиб борилмоқда.

Бундан ташқари, Италия-Швейцария «Plastedil» компанияси билан ҳамкорликда инновацион қурилиш материаллари (хусусан, олинмайдиган опалубкалар) ишлаб чиқарадиган завод ташкил этиш режалаштирилган.

Шунингдек, Ўзбекистон, Италия ва учинчи мамлакатлар, масалан, Хитой ва Россия корхоналари иштирокида уч томонлама лойиҳаларни амалга ошириш имкониятлари мавжуд.

Шу муносабат билан "Сирдарё" СЭЗда жойлашган «Peng Sheng» ўзбек-хитой қўшма корхонаси билан итальянча технологиялари ва брендларини жалб этган ҳолда чарм ва чарм маҳсулотлари ишлаб чиқариш соҳасида ишлар қайд этилди. Россия билан, шу жумладан, Италияда халқаро иқтисодий тадбирлар доирасида бундай ҳамкорлик имкониятларини муҳокама қилиш режалаштирилган.

 

Сурат манбаи: bigasia.ru