IFG Capital Ўзбекистонда $300млнлик вольфрам кластерини яратади

Тошкент. 2 октябр.ЎзТАГ – Люксембургнинг IFG Capital Partners халқаро компанияси Ўзбекистонда $300млнлик вольфрам кластерини яратиш бўйича эксклюзив битимни имзолади, деб хабар беради Ўзбек телеграф агентлиги (ЎзТАГ).

Компания матбуот хизматининг хабар қилишича, келишув IFG Capital Partners SA (IFG)нинг Марказий Осиёда маслаҳат ва инвестиция фаолияти билан шуғулланувчи IFG Metals & Mining бўлинмаси ва Ўзбекистон Геология ва минерал ресурслар давлат қўмитаси орасида имзоланган.

Келишув доирасида IFG Ўзбекистон вольфрам конини қазиб олишнинг техник-иқтисодий асосномасини ишлаб чиқиш ва вольфрамни ишлаб чиқариш ва қайта ишлаш кластерини яратиш бўйича эксклюзив ҳуқуқлар олади.

IFG компанияси 25-30 йил давомида $300 млн сармоя киритади ва бу орқали 1500 иш жойи яратади. Қайд этилишича, бу Ўзбекистон тоғ-кон саноатига киритилган энг йирик хорижий инвестицияси бўлади.

Бундан ташқари, лойиҳада SUN Group ҳам қатнашади. Бу ширкат Ҳиндистон, Россия, Ғарбий Африка ва бошқа шаклланаётган бозорларда фаолият юритади. Компания қўшимча комплекс баҳолаш ўтказиш шартида IFG билан биргаликда вольфрам кластерини қидириш ва ишлаб чиқишга рози бўлди.

Бошланғич геологик тадқиқотлар Ўзбекистоннинг 7 конида 130 минг тонна атрофида WO3 (вольфрам оксиди) мавжудлигини кўрсатди. Шу билан биргаликда Ўзбекистонда қайта ишлаш харажатлари мамлакатдаги қулай бизнес юритиш шароитлари натижасида янада паст бўлади.

Сурат манбаи: http://www.news.ykt.ru