Икки ўзбек теннисчи қизларидан биттаси Tashkent Open-2015нинг иккинчи босқичига чиқди
Тошкент. 30 сентябр. ЎзТАГ – Ўзбекистонлик теннисчи қиз Нигина Абдураимова хорватиялик Петре Мартични 6:4, 6:0 ҳисобида енгиб, Tashkent Open-2015нинг иккинчи босқичига чиқди, деб хабар беради Ўзбек телеграф агентлиги (ЎзТАГ).
“Нигина ўтган Tashkent Openда яримфиналгача борган эди. Бир йил давомида унинг тажрибаси ошди ва у ушбу натижасини қайтириши мумкин. Бунинг учун у иккинчи доирадан яхши ўтиши керак. Афсуски унга ўта кучли рақиба – Жоанна Ларсон (Швеция) тўғри келди”, - деб таъкидлашди мамлакат Теннис федерациясида.
Биринчи доирада Ларсон Штефани Фогелени (Швейцария) ҳар икки сетда бир хил 6:3, 6:3 ҳисобида ишончли равишда енгди.
Шунингдек, Абдураимова жуфтликда ҳам иштирок этади. Унга бу йўналишда Ўзбекистон термасининг бошқа вакиласи Оқгул Омонмуродова ҳамроҳлик қилади.
Бундан ташқари, яна бир ўзбек теннисчи қизи Сабина Шарипова турнирдаги чиқишини словакиялик Яне Чепеловага 2:6, 1:6 ҳисобида бой берган ҳолда якунлади.
Эслатиб ўтамизки, Тошкентнинг Очиқ чемпионати – кузда Тошкентда бўлиб ўтадиган аёллар халқаро профессионал теннис турнири бўлиб, қаттиқ қопламали кортларда ўйналади. 2009 йилдан бери мусобақа WTA халқаро сериясига киради. Турнирнинг соврин жамғармаси $250 минг бўлиб, унда яккаликда 32 иштирокчи, 16 жуфтлик қатнашади.
Мусобақа 1997 йилда эркаклар турнири сифатида ташкил этилган. У илк йилларда US Openдан кейин ўтказилган ва Ўзбекистон президенти номида бўлган. 2003 йилда мусобақа АТР қарорига кўра Бангкокка ўтказилган.
Аёллар турнири 1999 йилда алоҳида турнир сифатида ташкил этилган. 2003 йилда эркаклар турнири ёпилиши муносабати билан аёллар мусобақалари кузга кўчирилган.
Ҳозиргача турнир мезбонлари икки марта унда ғолибликни қўлга киритганлар. Ирода Тўлаганова 2000 йилда аёллар яккалик турнирида, Олег Огородов –1999 йилда эркаклар ўртасида жуфтликда ғолибликни қўлга киритганлар.
