Иккинчи чоракда Universal Mobile Systemsнинг абонентлари 51,8% кўпайди
Тошкент. 19 август. ЎзТАГ – 2015 йилнинг иккинчи чорагида россиянинг “Мобильные ТелеСистемы” телекоммуникация гуруҳи томонидан назорат қилинадиган Universal Mobile Systemsнинг (UMS) абонентлари 51,8% кўпайди, деб хабар беради Ўзбек телеграф агентлиги (ЎзТАГ).
“Компания абонентларининг умумий сони 643,1 мингдан ошди. 2015 йилнинг олти ойида оператор фаолиятини ривожлантиришга 241 млн рубл инвестиция қилинди. Ўзбекистондаги тушум 37 млрд сўмга етди (1 чоракда 19,3 млрд сўм)”, – деб таъкидланади МТС гуруҳининг 2015 йилнинг иккинчи чораги бўйича умумий молия ва операцион натижаларида.
Ҳисоботга мувофиқ, OIBDA кўрсаткичи минус 22,2 млрд сўмни, ARPU кўрсаткичи (ҳар ой бир абонентга тўғри келадиган ўртача ҳисоб миқдори) – 23373 сўмни (биринчи чоракда 21027 сўм) ташкил қилди, MOU кўрсаткичи (ҳар ойда бир абонентга тўғри келадиган трафик) 462 минутга етиб, 2015 йилнинг биринчи чорагидагига нисбатан 356 минутга ошди.
Эслатиб ўтамизки, UMS 2014 йил 24 сентябрда россиянинг МТС (50,01%) ва Ўзбекистон Алоқа, ахборотлаштириш ва телекоммуникация технологиялари давлат қўмитаси ҳузуридаги “Радиоалоқа ва телевидение маркази” унитар корхонаси томонидан (49,99%) ташкил этилган. МТСнинг Ўзбекистондаги “Уздунробита” ширкатига тегишли мулк, ускуна ва инфраструктура UMSга берилган. У 2G, 3G ва LTE хизматларига лицензия, частота ва рақамларга эга.
UMS тармоғи илк маротаба 2014 йил 1 декабрда ишга туширилган эди.
