Ҳиндистон компанияси Ўзбекистонда қалампирни қайта ишлашни режалаштирмоқда
Тошкент. 20 декабр. ЎзТАГ – Ўзбекистон Республикаси Инвестициялар бўйича давлат қўмитасида Ҳиндистоннинг Synthite Industries Ltd компанияси билан қалампирни етиштириш ва қайта ишлаш лойиҳаси муҳокама қилинди, деб хабар беради Ўзбек телеграф агентлиги (ЎзТАГ).
Учрашув Ҳиндистон компанияси вакилларининг Ўзбекистонга 10 декабрдан 16 декабргача давом этган ташрифи доирасида бўлиб ўтди. Қўшма лойиҳа доирасида тажриба қишлоқ хўжалик маҳсулоти сифатида қалампир танланган.
“Ўзбекозиқовқахолдинг” компанияси ва Synthite Industries Ltd ўртасида қалампирни қайта ишлашни ташкил этиш бўйича $4 млнлик битим Ўзбекистон президенти Ш. Мирзиёевнинг Ҳиндистонга расмий ташрифи доирасида имзоланган эди.
Ташриф чоғида компания вакиллари Самарқанд, Хоразм ва Тошкент вилоятларининг ҳокимликлари (маъмуриятлари - ЎзТАГ) раҳбарлари билан учрашдилар, бу ерда уларга қишлоқ хўжалиги экинларини етиштириш ва қайта ишлаш учун ер участкалари кўрсатилди. Лойиҳани амалга ошириш учун ушбу ерлар танлаб олинди.
Ҳиндистон компанияси томонидан олиб борилаётган Ўзбекистон бозорининг маркетинг тадқиқотлари 2019 йил бошида якунланади. Шундан кейин компания маҳсулотларнинг синов намуналарини етиштиришни бошлашни режалаштирмоқда.
Эслатиб ўтамиз, Synthite Industries Ltd – зираворлар ва эфир ёғларининг Ҳиндистондаги йирик ишлаб чиқарувчисидир. 2017 йилда компаниянинг айланмаси $250 млндан ошган.
Сурат манбаи: https://www.idntimes.com
