Қирғиз фуқаролари ўзбек чегарачисини қўлга олдилар
Тошкент. 30 сентябр. ЎзТАГ – Қирғиз фуқаролари ўзбек чегарачисини қўлга олдилар, деб хабар беради Ўзбек телеграф агентлиги (ЎзТАГ) куч тизимларидаги ўз манбаларига асосланган ҳолда.
Маълумотга кўра, ушбу ҳодиса душанба, 28 сентябрда Фарғона вилояти Фарғона тумани Тоштепа аҳоли пункти яқинидаги ўзбек-қирғиз чегарасида содир бўлган.
“Соат 12лар атрофида икки Қирғизистон фуқароси чегара линиясини кесиб ўтиб, ўзбек чегарачиларини ҳақорат қила бошлаганлар. Натижада ўзбек чегара наряди улардан бирини қўлга олди, иккинчи шахс эса қирғиз ҳудудига яширинди”, - деб таъкидлади агентлик суҳбатдоши.
Манба сўзларига кўра, қўлга олинган қоидабузар қаршилик кўрсатиб, ўзбек чегарачисининг бошига жароҳат етказган. Шу пайт қирғиз томонидан 6 кишилик ёрдам етиб келиб, жароҳатланган ўзбек чегарачисини калтаклаб, уни қирғиз ҳудудига олиб ўтиб кетганлар.
Шунингдек, агентлик суҳбатдоши калтаклаш билан чегараланмаган тўда чегарачининг 7,62 мм калибрли жанговар патронлари, пичоғи, соати ва бошқа нарсаларини ҳам олиб қўйган.
Ўтказилган музокаралардан кейин ўзбек чегарачиси Ўзбекистон ҳудудига қайтарилган ва бу ерда тезда касалхонага олиб борилган. Шифокорлар унинг танасида кўплаб жароҳатлар, бошида ва бошқа ерларида катта яралар борлигини аниқладилар. Ҳозирда чегарачининг ҳолати “ўртача оғирликда”, деб баҳоланмоқда.
