Ислом Каримов якка тадбиркорларга янги имтиёзлар берди
Тошкент. 18 май. ЎзТАГ – Ўзбекистонда кичик бизнес вакилларига қатор солиқ имтиёзлари тақдим этилди. Бунга доир тегишли қарор давлат раҳбари Ислом Каримов томонидан имзоланди, деб хабар беради Ўзбек телеграф агентлиги (ЎзТАГ).
“2015 йилнинг 1 июлидан бошлаб якка тадбиркорлар фаолият туридан келиб чиқиб бюджетдан ташқари Пенсия жамғармасига энг кам иш ҳақининг 50% суғурта бадали ва якка тадбиркор иш берувчилар учун белгиланган ставканинг 30% миқдорида белгиланган солиқни тўлаган ҳолда бир кишидан уч кишигача ишчи ёллашлари мумкин. Бундан ташқари, якка тадбиркорлар касб-ҳунар коллежлари битирувчилари бўлган ёлланган ишчилар учун белгиланган солиқни тўлашдан улар коллежни битирган санадан бошлаб 12 ой давомида озод этиладилар”, – деб таъкидланади хужжатда.
