Канаданинг “Ross Video Ltd” компанияси Ўзбекистон бозорига чиқишни режалаштирмоқда
Тошкент. 2 феврал. ЎзТАГ – Тошкентда Ўзбекистон Миллий телерадиокомпанияси (МТРК) ва канаданинг “Ross Video Ltd” ширкати вакиллари ўртасида учрашув бўлиб ўтди, дея хабар беради Ўзбек телеграф агентлиги (ЎзТАГ).
“Музокаралар доирасида томонлар 2015 йилда МТРК телерадиоканаллари ижодий ва техник мутахассислари учун қатор учрашув ва тренинглар ўтказиш ҳақида келишувлар туздилар. Бу кенг кўламли узатишлар жараёнини яратиш бўйича илғор техник ечимларга доир тажриба ва амалий билимлар билан алмашишга имкон беради. Музокараларда асосий эътибор канада томонини Тошкент телемарказининг амалдаги телевизион мажмуи билан таништириш, бу ерда 3D график тизимлар, виртуал студиялар, видео-сервер ва видео-аудио монтаж бўйича платформалар ташкил этиш имкониятларини ўрганиш кабиларга қаратилди”, – деб таъкидлашди Миллий телерадиокомпания матбуот хизматида.
Маълумот ўрнида, канада компанияси кенг турдаги инновацион телемаҳсулотлар, жумладан, экранни бошқариш бўйича сенсор тизимлар, телевизион камералар учун роботлашган тизимлар, 3D график тизимлар, видео ва аудио монтаж учун видео серверлар ишлаб чиқаришга ихтисослашган.
