Каримов Эрдўғон ва Меркелга Истамбулдаги теракт муносабати билан ҳамдардлик билдирди

Тошкент. 14 январ. ЎзТАГ – Ўзбекистон президенти Ислом Каримов Режеп Таййип Эрдўғон ва Ангела Меркелга Истамбулдаги теракт муносабати билан ҳамдардлик билдирди. Ба ҳақида ТИВ матбуот хизмати хабар қилди.

“Ўзбекистон Республикаси Президенти Ислом Каримов Туркия Республикаси Президенти Режеп Таййип Эрдўғанга 2016-йилнинг 12-январ куни Истанбул шаҳрида инсонларнинг ҳалок бўлишига олиб келган террорчилик ҳаракати муносабати билан чуқур ҳамдардлик билдириб мактуб йўллади”, - дейилади хабарда.

Шунингдек, давлат раҳбари Германия канцлери Ангела Меркелга ҳам ҳамдардлик мактуби йўллади.

“Германия Федератив Республикасининг Федерал канцлери Ангела Меркел номига йўлланган мактубда давлатимиз раҳбари Истанбулдаги террорчилик ҳужуми оқибатида ҳалок бўлган Германия фуқароларининг оила аъзолари ва яқинларига самимий ҳамдардлик туйғуларини етказишни сўради”, - деб таъкидланади хабарда.

Олдин ОАВ хабар қилгани каби 12 январда Истамбул марказидаги Султанахмет майдони яқинида портлаш содир бўлган эди. Бошланғич маълумотларга кўра, 10 киши ҳаётдан кўз юмиб, 15 киши жабрланган. Ҳалок бўлганлар орасида Германия, Норвегиялик сайёҳлар бўлгани айтилмоқда. Портлаш ускунаси террорчи-ҳудкуш томонидан ҳаракатга келтирилгани айтиб ўтилмоқда.

ЎзР ТИВ маълумотларига кўра, вафот этганлар ва жабрланганлар орасида Ўзбекистон фуқаролари йўқ.