Каримов Япониянинг Кюсю оролидаги зилзила муносабати билан ҳамдардлик билдирди
Тошкент. 18 апрел. ЎзТАГ – Ўзбекистон Республикаси президенти Ислом Каримов Япония жанубидаги Кюсю оролидаги кучли зилзилалар натижасида кўп сонли инсонлар ҳалок бўлиши ва вайронгарчиликка олиб келиши муносабати билан Япония Бош вазири Синдзо Абега чуқур ҳамдардлик билдирди, деб хабар беради Ўзбек телеграф агентлиги (ЎзТАГ).
“Мактубда давлатимиз раҳбари қурбон бўлганларнинг оила аъзоларига ва яқинларига ҳамда жабрланганларга чуқур ҳамдардлик ва далда билдирди”, - деб таъкидланади Ўзбекистон ТИВ хабарида.
Эслатиб ўтамизки, жанубий-ғарбий Кюсю ороли икки кундирки кучли ер ости силкинишларидан азият чекмоқда. Ўтган кеча Япония жанубий-ғарбини кучи 7,3 баллга етган зилзилалар титратди. Сўнгги маълумотларга кўра, қурбонлар сони 41 етган, 2 мингдан ортиқ киши касалхоналарга ётқизилган, улардан 170 оғир аҳволда қолмоқда.
