Халқаро кураш уюшмаси ўзбекистонликларни йилнинг энг яхши курашчи ва тренери деб топди

Тошкент. 20 январ. ЎзТАГ – Ўзбек спортчиси Давлат Абраев “2015 йилнинг энг яхши курашчиси” деб, Ўзбекистон миллий термаси тренери Муратбой Дусумбетов “Энг яхши тренер”и деб топилди, деб хабар беради Ўзбек телеграф агентлиги (ЎзТАГ).

Бу тўғрисида Халқаро кураш уюшмаси томонидан ҳар йиллик “2015 йилда IKAнинг Энг яхши Инсон ва Воқеалари” номинацияси ғолибларини эълон қилиш доирасида маълум қилинди.

Уюшма маълумотларига кўра, Ўзбекистон вакилларидан ташқари, совриндорлар орасида “Энг яхши курашчи аёл” йўналиши ғолибаси Галакси Экшон (ЖАР), “Энг яхши ҳакам” йўналиши ғолиби Хок Туан Нгайен (Вьетнам) ҳам бор.

Шунингдек, “Энг яхши чемпионат” деб Хуррамободдаги (Эрон) Катталар ўртасидаги X Жаҳон чемпионати, “Энг яхши воқеа” деб курашнинг 2018 йилги Индонезиядаги Ёзги Осиё ўйинлари дастурига киритилиши, “Энг яхши ташаббус” Доминикан Республикасидаги “Кураш ойлиги”, “Энг яхши миллий федерация” деб Ҳиндистон кураш уюшмаси ва “Энг яхши қитъа федерацияси” деб Европа кураш конфедерацияси топилди.