Хитой Ипак йўли жамғармасини ташкил этишга $40 млрд йўллайди
Тошкент. 10 ноябр. ЎзТАГ – Хитой Ипак йўли жамғармасини ташкил этишга $40 млрд йўллайди, деб хабар қилди куни кеча “Синьхуа” агентлиги.
“ХХР раиси Си Цзиньпин Хитой Ипак йўли жамғармасини ташкил этишга $40 млрд ажратишини баён қилди”, – дейилади хабарда.
ХХР раисининг таъкидлашича, жамғармани таклиф этишдан мақсад “Осиёнинг транспорт-коммуникацион муаммоларини молиялаштириш платформасини шакллантирган ҳолда ҳал қилишдан иборат. Жамғарма инфраструктура, ресурслар, саноат ва молия соҳаларида, шунингдек, Ипак йўли иқтисодий белбоғи ва 21 аср денгиз Ипак йўлида жойлашган мамлакатларнинг иштирокидаги лойиҳалар учун инвестициялар тикиш ва молия кўмаги кўрсатиш билан шуғулланади. Жамғарма Осиё ва дунёнинг бошқа мамлакатлари инвесторлари учун ҳам очиқ бўлади.
С.Цзиньпин Осиёнинг транспорт-коммуникацион алоқаларини қитъанинг янги ўсиш омиллари ва рақобатбардош афзалликларини юзага чиқариш жараёнидаги ҳал қилувчи бўғин деб атади. ХХР раиси Осиёнинг транспорт-коммуникацион алоқаларини иқтисодий коридорларга асосланган ҳолда яратилиши зарурлигини кўрсатиб, Ипак йўли иқтисодий белбоғи ва денгиз Ипак йўли лойиҳалари ҳозирдаёқ “шаклланиб бўлганлигини” қайд этди.
С.Цзиньпин осиё мамлакатлари транспорт инфраструктурасининг ривожи ҳисобига Ипак йўли алоқалари самараларига иложи борича тезроқ эришишлари лозимлигини, яқин 5 йил ичида Хитой транспорт-коммуникация соҳасида ҳудуд мамлакатларига 20 минг мутахассис тайёрлаб беришда кўмак беришини таъкидлади.
Қайд этилишича, С.Цзиньпин буларни Бангладеш, Камбоджа, Лаос, Монголия, Мьянма, Покистон ва Тожикистон раҳбарлари олдидаги чиқишида айтиб ўтган бўлиб, унда Осиё-Тинч океани ҳудуди транспорт-коммуникация ҳудудини ривожлантириш бўйича 5 бўғиндан иборат режа тақдим этилган. Шунингдек, учрашувда Осиё ва Тинч океани Иқтисодий ва ижтимоий комиссияси (ЭСКАТО) ва Шанхай ҳамкорлик ташкилоти вакиллари ҳам қатнашган.
