Хитой компанияси Ўзбекистонга $500 млн сармоя киритади

Тошкент. 14 декабр. ЎзТАГ – Хитойнинг Henan Wanbang Selected Supply Chain Management Co.Ltd компанияси Ўзбекистондаги 15 қўшма лойиҳаларга $500 млн сармоя киритади, деб хабар беради Ўзбек телеграф агентлиги (ЎзТАГ) маҳаллий ОАВга асосланган ҳолда.

UZ24 нашри маълумотига кўра, компания бунга доир келишувни Ўзбекистон Республикаси Қишлоқ ва сув хўжалиги вазирлиги ва “Ўзбекозиқовқатхолдинг” ширкати билан имзолаган.

Тегишли ҳужжжатлар хитой компаниясининг раҳбариятининг  5–12 декабр кунлари Ўзбекистонга ташрифи доирасида имзоланди. Компания вакиллари Тошкент, Самарқанд, Жиззах, Сирдарё вилоятларида бўлдилар. 

Келишув қишлоқ хўжалиги, жумладан, чорвачилик маҳсулотларини етиштириш, кўпайтириш, қайта ишлаш ва қадоқлаш, шунингдек, тайёр маҳсулотларни экспорт, импорт ва реэкспорт қилиш каби йўналишларда лойиҳалар амалга оширишни кўзда тутади.

Ўзбекистоннинг эркин иқтисодий зоналарида 10 минг гектар майдонда логистика марказлари ва қишлоқ хўжалик маҳсулотларини қайта ишлаш объектларини барпо этиш режалаштирилган. Бундан ташқари, Хитойга 100 минг тонна ўзбек мошини етказиб бериш ҳам режалаштирилмоқда. 

Сурат манбаи: http://www.ntv.ru/novosti/1277384/