“Хитой – кучли рақиб, лекин биз ўз кучимизга ишонамиз”– Миржалол Қосимов

Тошкент. 14 январ. ЎзТАГ – Куни-кеча ўзбекистонликларнинг бош мураббийси 2015 йилги Осиё Кубоги гуруҳ босқичи иккинчи тури доирасидаги Хитой термаси билан бўладиган учрашув олдидан фикрлари билан ўртоқлашди, дея хабар беради Ўзбек телеграф агентлиги (ЎзТАГ).

“Бизни қизиқарли учрашув кутмоқда. Хитой терма жамоаси ҳам илк турда худди биз каби ғалаба қозонган. Шундай экан, ўйин анча қизғин кечиши кутилмоқда. Хитой анча кучли рақиб, аммо биз ўз кучимизга ишонамиз шу сабабли жамоамиз навбатдаги 3 очкони олиш учун зарур бўлган барча нарсани қилади”, - деб таъкидлади Миржалол Қосимов.

Унинг сўзларига кўра, у рақиб ўйинчиларидан биронтасини ажратиб кўрсатишни ёқтирмайди. “Футбол – жамоавий ўйин ва унда натижани майдондаги 11 ўйинчи қўлга киритади. Аммо, Хитой терма жамоаси сафидаги 10-рақамли ўйинчи анча кучли. Шунингдек, қанот ҳимоячилари ва дарвозабони ҳам яхши ўйин намойиш этишади. Уларнинг ўйини ушбу жамоада кўп нарсани ҳал қилади”, - деди Ўзбекистон миллий термаси мураббийси.

Мазкур ўйин бугун тошкент вақти билан соат 14.00да Брисбендаги “Санкорп” стадионида бўлиб ўтади.

Эслатиб ўтамизки, Осиё қитъасининг 16-биринчилиги 9-31 январ кунлари Австралиянинг беш шаҳри - Сидней, Ньюкасл, Брисбен, Канберра ва Мельбурнда бўлиб ўтмоқда.