Хитойда Ўзбек киноси кунлари бошланди

Тошкент. 1 июл. ЎзТАГ – Хитойнинг Пекин, Шанхай ва Сиан шаҳарларида Ўзбек киноси кунлари бошланди, деб хабар беради Ўзбек телеграф агентлиги (ЎзТАГ).

“Дастурга ўзбек кинематографининг миллий ўзига хослигимизни очиб берувчи энг яхши фильмлари кирди. Фестивал режиссёр Ёлқин Тўйчиев томонидан суратга олинган “Ҳаётда...” филми билан очиб берилди”,  - деб таъкидлашди “Ўзбеккино” агентлигида.

Шунингдек, хитойлик томошабинлар ўзбек киноижодкорлари томонидан яратилган “Қудуқ”, “Виждон”, “Ота”, “Тубанлик”, “Сеҳрли қалпоқча” номли бадиий филмларни ҳам кўрадилар.

Уларда Ўзбекистон кино санъатининг бой анъаналари, миллий ва халқаро кино санъатининг илғор йўналишлари акс этган. Ушбу картиналар хитойлик томошабинларни ўзбек халқининг ҳаёт тарзи, анъана ва урф-одатлари ва менталитети билан таништиради.

“Ўзбек-хитой алоқаларининг барча соҳаларда ривожланаётгани бизни хурсанд қилмоқда. Ўзбекистонда бошқа санъатлар билан биргаликда кино санъати ҳам ривожланмоқда. Ўзбек фильмлари бутун дунёда оммавийлашиб бормоқда. Ушбу фестивал нафақат хитойлик киноихлосмандларни ўзбек филмлари билан таништириш, балки икки халқ ўртасида тобора равнақ топиб бораётган дўстона алоқаларни янада мустаҳкамлашга ҳам хизмат қилади”, - деб таъкилади Хитой Халқ Республикаси Матбуот, ноширлик, радиоэшиттириш, кинематография ва телевидение ишлари бўйича Давлат бош бошқармаси бошлиғи Чжан Хунсен.