Хитойнинг CNTIC компанияси Ўзбекистон темир йўллари учун $50 млнлик ускуналар етказиб беради
Тошкент. 8 август. ЎзТАГ – Хитой Савдо-иқтисодий корпорацияси (CNTIC) Ўзбекистонга темир йўл ускуналари етказиб беради, деб хабар қилди РИА Новости.
Хитой корпорацияси “Ўзбекистон темир йўллари” ДАТЙК билан Ўзбекистон жанубидаги “Қарши-Термиз” темир йўлини электрлаштириш учун қиймати $50 млнлик ускуналар етказиб беради.
2013 йилда эълон қилинган тендор натижаларига кўра имзоланган шартнома доирасида CNTIC ташқи электр таъминоти, тармоққа хизмат кўрсатиш машиналари, йўл ўтказгичлар учун тайёр ускуналар етказиб беради. Йил давомида хитой компанияси “Ўзбекистон темир йўллари” ДАТЙК билан республика жанубидаги яна бир темир йўл қисми - “Мароқанд-Қарши”ни электрлаштириш учун қиймати $45,6 млнлик ускуналар етказиб бериш бўйича иккита шартнома имзолади
Эслатиб ўтамизки, 2012 йилда “Ўзбекистон темир йўллари” ДАТЙК узунлиги 465,8 км бўлган юқоридаги икки темир йўл қисмларини электрлаштиришга киришган эди.
Умумий қиймати $716,4 млн бўлган лойиҳани амалга ошириш инфраструктура ва ижтимоий объектларни қуришни ҳам ўз ичига олиб, олти йилга мўлжалланган. Лойиҳа Япон халқаро ҳамкорлик агентлигининг (JICA) $220 млн, Осиё тараққиёт банкининг $100 млн кредитлари ва “Ўзбекистон темир йўллари”нинг ўз маблағлари ҳисобига амалга оширилмоқда.
Ўзбекистон темир йўлларининг умумий узунлиги 4,2 минг км, шундан деярли 1 минг км электрлаштирилган. Жами республикада 2 минг км темир йўлларни электрлаштириш режалаштирилмоқда. Ўзбекистон темир йўллари орқали мамлакат ичидаги юк ташиш ҳажмининг 60% ва экспорт/импорт юкларининг 80% ташилади, деб ёзади агентлик.
