Хитойнинг CNTIC ва Латвиянинг Belam Riga компаниялари “Мароқанд-Қарши” темир йўлини электрлаштиради
Дата: 16:58, 18-07-2014.
Тошкент. 18 июл. ЎзТАГ – Хитойнинг CNTIC ва Латвиянинг Belam Riga компаниялари Ўзбекистон жанубидаги “Мароқанд-Қарши” темир йўлини электрлаштириш учун ускуналар етказиб бериш бўйича тендерини ютдилар, деб ёзади Podrobno.uz нашри.
Тендер доирасида CNTIC трансформатор подстанциялари ва улаш тармоқлари, Belam Riga ширкати эса сигнализация, марказлаштириш ва блоклаш, телекоммуникация ва SCADA тизимларини етказиб беради.
Бошланғич қиймати $51 млн бўлган ушбу тендер “Ўзбекистон темир йўллари” ДАК томонидан ўтган йилнинг апрелида эълон қилинган эди. Ғолиблар билан шартнома бир ой ичида имзоланади.
Ўзбекистон темир йўлларининг умумий узунлиги 4,2 минг км бўлгани ҳолда, шундан деярли 1 минг километри электрлаштирилган. Жами республикада 2 минг км атрофида темир йўлларни электрлаштириш режалаштирилмоқда. Мамлакат юк ташувининг 60% атрофидаси ва экспорт-импорт юк ташувларининг деярли 80% темир йўллар ҳисобига тўғри келади, деб ёзади агентлик.
