Хоразм вилоятида текстиль корхонаси нол қийматида сотилмоқда
Тошкент. 4 июн. ЎзТАГ – Ўзбекистон Республикаси Хусусийлаштириш, монополиядан чиқариш ва рақобатни ривожлантириш қўмитасининг Хоразм вилояти бўйича ҳудудий бўлинмаси қурилиши тугалланмаган текстиль мулк мажмуини нол қийматида сотиш бўйича тендер эълон қилди, дея хабар беради Ўзбек телеграф агентлиги (ЎзТАГ).
Сотилаётган объект Хоразм вилоятининг Янгиариқ туманида жойлашган. Тендерда Ўзбекистон Республикаси резидентлари ва норезидентлари бўлган жисмоний шахслар қатнашишлари мумкин.
Текстиль мажмуини сотиб олмоқчи бўлган харидорларга қўйиладиган асосий талаб – хариддан кейинги ики йил ичида корхонага камида $10 млн сармоя киритиш ва 200та янги иш ўринлари яратиш ҳамда текстиль соҳасида ишлаб чиқаришни йўлга қўйишдан иборат.
Шунингдек, тендер комиссиясига қўшимча равишда олинган мажбуриятларни бажариш муддатлари, ишлаб чиқаришда фойдаланиладиган ускуналарнинг техник параметрлари кўрсатилган бизнес режа ва инвестиция дастурини тақдим қилиш талаб этилади.
